Pracavaŭ na pramoha kankurenta: za što sudziać eks-namieśnika ministra transpartu
14.04.2017 / 11:51
U Minskim haradskim sudzie 14 krasavika pačaŭsia praces ab złoŭžyvańni słužbovymi paŭnamoctvami. Na łavie padsudnych troje čynoŭnikaŭ: były namieśnik ministra transpartu Jaŭhien Rahačoŭ, były pieršy namieśnik načalnika BČ Uładzimir Michajluk i namieśnik hienieralnaha dyrektara pradpryjemstva «Bielintertrans» Biełčyhunki Uładzisłaŭ Lembijeŭski.
Jaŭhien Rahačoŭ
Usie jany byli zatrymanyja jašče ŭ śniežni 2015 hoda. Ciapier 43-hadovamu Rahačovu i 33-hadovamu Lembijeŭskamu pahražaje da 10 hadoŭ.
Uładzimir Michajluk
58-hadovy Michajluk moža sieści na 6 hadoŭ.
Rahačoŭ zajaviŭ chadajnictva, kab u jakaści abaroncy na praces vyklikali jaho baćku, bo toj «usio žyćcio adpracavaŭ na čyhuncy, dobry śpiecyjalist i moža dapamahčy sudu». Sudździa Ihar Lubavicki, praŭda, adchiliŭ chadajnictva — Rahačoŭ-starejšy były čyhunačny načalnik, ale ž jurydyčnaj adukacyi nie maje.
Asnoŭnyja pretenzii da Rahačova i kampanii ŭ śledstva nastupnyja. Čynoŭnikaŭ abvinavačvajuć u «dapamozie» kampanii «Sifud-siervis», jakaja zajmałasia transparciroŭkaj hruzaŭ i faktyčna była kankurentam Biełaruskaj Čyhunki.
Rahačoŭ, pa viersii śledstva, ustupiŭ u zmovu z kiraŭnikom «Sifud-siervisa» Vitalom Pietrukievičam.
Takim čynam, padčas svajoj pracy na kiraŭničych pasadach pačynajučy z 2010 hoda Rahačoŭ imknuŭsia dziejničać u intaresach Pietrukieviča.
Spačatku Rahačoŭ kiravaŭ BTŁC (transpartna-łahistyčnym centram čyhunki). Paśla pajšoŭ u pieršyja namieśniki ministra transpartu, na pasadzie ŭ BTŁC jaho źmianiŭ Lembijeŭski.
Uładzisłaŭ Lembijeŭski
Lembijeŭskaha i Michajluka vinavaciać u zmovie z Rahačovym — jany dapamahali jamu ŭ «padtrymcy» kampanii «Sifud-siervis».
U pryvatnaści, Rahačoŭ zaklučaŭ nievyhadnyja damovy pamiž «Sifud-siervisam» i Biełčyhunkaj. Akramia taho, čynoŭnik namahaŭsia rasfarmiravać refryžeratarnyja siekcyi Biełčyhunki. Častka refryžeratarnych vahonaŭ nasamreč była pieradadziena z vahonnaha depo ŭ Maładziečnie ŭ viedamstva BTŁC, a adtul — «Sifud-siervisu». U vyniku hetaha pryjšłosia skaracić kala 50 rabočych Biełčyhunki.
Praściej kažučy, śledstva miarkuje, što Rahačoŭ dapamahaŭ «Sifud-siervisu» stać manapalistam u halinie pieravozki hruzaŭ, jakija chutka psujucca i dla jakich patrebnyja refryžeratarnyja vahony. Dla hetaha jon rasfarmiroŭvaŭ adpaviednaje padraździaleńnie na Biełčyhuncy i pieradavaŭ vahony kampanii svajho znajomaha Vitala Pietrukieviča. Dapamahali namieśniku ministra jaho padnačalenyja: pieršy namieśnik načalnika BČ Uładzimir Michajluk i namieśnik hienieralnaha dyrektara «Bielintertransa» (BTŁC) Uładzisłaŭ Lembijeŭski.
Paciarpiełymi pa spravie prachodziać rabočyja čyhunki, jakich skaracili ŭ vyniku dziejańniaŭ čynoŭnikaŭ: ahułam bolš za 40 čałaviek. Na pasiadžeńnie pryjšli piaciora z paciarpiełych.
Uładzimir Michajluk, darečy, jašče abvinavačvaŭsia ŭ «psavańni ziamli». La svajho doma pad Minskam jon niezakonna vykapaŭ dva štučnyja vadajomy. Ale škoda dziaržavie była kampiensavanaja.
Taksama, pryčym u trochrazovym pamiery, Michajlukom była kampiensavanaja škoda, naniesienaja dziaržavie ŭ suviazi sa złoŭžyvańniem słužbovymi paŭnamoctvami.