Chto taki Alaksandr Zimnicki, čarhovy zatrymany pa «spravie bajevikoŭ»

30.03.2017 / 07:17

Alaksandr Zimnicki staŭ 27-m zatrymanym pa tak zvanaj «spravie bajevikoŭ». 28 sakavika rodnyja zhubili ź im suviaź. Paźniej stała viadoma, što jon zatrymany, abvinavačańni jamu nie vystaŭlenyja.

Rodam z Dokšyckaha rajona

Mama Alaksandra Zimnickaha tam pracavała nianiečkaj. Raskošy nie viedaŭ, padčas vučoby zarablaŭ sabie na žyćcio, padpracoŭvajučy hruzčykam. Byŭ zvyčajnym chłopcam, kažuć jahonyja adnakłaśniki i adnahrupniki.

Historyk, supracoŭnik muzieja

Alaksandr Zimnicki — vypusknik histfaka BDU, navukovy supracoŭnik Nacyjanalnaha histaryčnaha muzieja. Na pracy vielmi ździvilisia, kali pačuli takuju navinu: «Jon jašče ŭčora byŭ na pracy, nas nichto pra heta nie infarmavaŭ», — piša Jeŭraradyjo.

Starasta hrupy

Alaksandr Zimnicki vučyŭsia na biełaruskamoŭnaj płyni histaryčnaha fakulteta, byŭ starastam hrupy. Braŭ udzieł va ŭniviersiteckich mierapryjemstvach, vystupaŭ na kancertach, dobra vučyŭsia. Paśla vučoby atrymaŭ raźmierkavańnie ŭ Nacyjanalny histaryčny muziej.

Aśpirant Instytuta vyšejšaj škoły

Paralelna Alaksandr vučycca ŭ aśpirantury Respublikanskaha instytuta vyšejšaj škoły.

«U jaho zdolnaści da navukovaj pracy. Z hetaha punktu hledžańnia jon nas całkam zadavalniaŭ. Jon vykonvaŭ indyvidualny płan, mieŭ dobryja vodhuki ad svajho navukovaha kiraŭnika. Jaho navukovaja tema — pačatak dziaržaŭnaści, družynny typ kiravańnia staražytnych kniazioŭ», — apisvajuć Alaksandra Zimnickaha na kafiedry historyka-kulturnaj spadčyny Biełarusi Respublikanskaha instytuta vyšejšaj škoły.

Zastajecca niezrazumiełym, jak 25-hadovy historyk moža być źviazany z «Biełym lehijonam», bo hetaja arhanizacyja prypyniła svajo isnavańnie ŭ čas kali jon jašče vučyŭsia ŭ małodšaj škole. Pry pieratrusie ŭ Alaksandra byŭ kanfiskavany pnieŭmatyčny pistalet (mieć ich dazvolena).

Cikaviŭsia vajskovaj spravaj

Pavodle infarmacyi «Našaj Nivy», Zimnicki moh taksama ŭdzielničać u vajskova-patryjatyčnych letnikach, bo, u pryncypie, cikaviŭsia vajskovaj spravaj i byŭ fizična dužym chłopcam.