Błohiera Łapšyna ŭ kajdankach dastavili śpiecrejsam ź Minska ŭ Baku
08.02.2017 / 08:29
Rasijska-izrailskaha błohiera Alaksandra Łapšyna, čyju skarhu na rašeńnie ab ekstradycyi 7 lutaha adchiliŭ Viarchoŭny sud Biełarusi, u aŭtorak bližej da viečara dastavili ŭ Baku.
Jak paviedamlajuć azierbajdžanskija ŚMI, Łapšyna sa stalicy Biełarusi dastavili śpiecrejsam u bakinski aeraport imia Hiejdara Alijeva.
Amal adrazu Łapšyn byŭ adpraŭleny ŭ izalatar Słužby dziaržbiaśpieki.
Błohier znachodziŭsia ŭ čornym śpisie azierbajdžanskaha MZS za naviedvańnie Nahornaha Karabacha. Za antykanstytucyjnyja zakliki i niezakonny ŭjezd u Azierbajdžan Łapšynu ŭ Azierbajdžanie pahražaje da vaśmi hadoŭ pazbaŭleńnia voli.
Alaksandra Łapšyna zatrymali ŭ Minsku ŭ noč na 15 śniežnia 2016 hoda pa zapycie Azierbajdžana. 17 studzienia namieśnik hienprakurora Biełarusi Alaksiej Stuk pastanaviŭ ekstradavać błohiera ŭ Azierbajdžan.
7 lutaha Viarchoŭny sud, u jakim błohier abskardziŭ dadzienaje rašeńnie, pakinuŭ jaho ŭ sile. Za zatrymanaha zastupiŭsia Izrail, adna z krain hramadzianstva Łapšyna.
Rasija taksama vykazałasia suprać ekstradycyi Łapšyna ŭ Azierbajdžan.