Łukašenka zapatrabavaŭ harantavać biaśpieku hramadzian padčas navahodnich i kaladnych śviataŭ
26.12.2016 / 11:15
Alaksandr Łukašenka daručyŭ dziaržaŭnym orhanam źviarnuć asablivuju ŭvahu na harantavańnie biaśpieki hramadzian u pieryjad navahodnich i kaladnych śviataŭ. Pra heta jon zajaviŭ siońnia na naradzie ŭ Minsku.
«Padziei ŭ Rasii, jakija adbylisia ŭ apošni čas, — dadajcie siudy jašče roznaha rodu vybuchi bałonaŭ u mietro ŭ Maskvie, trahiedyi na darohach i inšaje, — kažuć pra toje, što nam ni ŭ jakim razie nielha rassłablacca. My nie znachodzimsia niedzie ŭ baku ad stałbavoj darohi hetych strašnych zdareńniaŭ. Naadvarot, my znachodzimsia ŭ samym epicentry. Tamu čaho b nam ni kaštavała, treba zachavać mir i spakoj u našaj krainie. Heta — hałoŭnaje», — padkreśliŭ biełaruski lider.
«Kali hetaha nie budzie, nijakaja ekanomika budzie nie patrebnaja, nijakija pradukty charčavańnia, nijakaje finansavańnie, ni źniešniaje, ni ŭnutranaje. Hałoŭnaje pytańnie heta — pytańnie biaśpieki i stabilnaści našaha hramadstva», — zajaviŭ kiraŭnik dziaržavy.
Jon zapatrabavaŭ źviarnuć na adpaviednyja pytańni pilnuju ŭvahu, pačynajučy ad miascovych orhanaŭ ułady, kiraŭnikoŭ sielskich, pasiałkovych savietaŭ, zakančvajučy uradam, Dziaržsakrataryjatam Rady biaśpieki, KDK, Administracyjaj prezidenta.
«Ja prašu heta mieć na ŭvazie pierš za ŭsio, asabliva napiaredadni masavych mierapryjemstvaŭ, źviazanych sa śvietłymi i radasnymi dla kožnaha čałavieka śviatami — Novym hodam i Kaladami, — adznačyŭ kiraŭnik krainy. — Strašnaja katastrofa ŭ kvadracie, kali ludzi hinuć, čakajučy hetych uračystaściaŭ, śviataŭ. Heta niedapuščalna».
«Asabliva ludziam u pahonach treba zrabić usio, kab na vulicach było spakojna, kab ludzi praviali narmalna śviata», — dadaŭ kiraŭnik dziaržavy.