Pieršaja «Mis Biełaruś» pieramahła ŭ konkursie pryhažości dla zamužnich dam «Misis ziamny šar-2017»

Biełaruska Śviatłana Kuźniacova pieramahła ŭ mižnarodnym konkursie pryhažości dla zamužnich žančyn Mrs. Globe («Misis Ziamny šar»). Pra heta jana raspaviała na svajoj staroncy ŭ Facebook.

11.12.2016 / 22:56

Śviatłana Kuźniacova ŭ centry. Fota: Facebook

Finał Mrs. Globe-2017 prajšoŭ u Kitai 11 śniežnia. U im uziali ŭdzieł kankursantki z 68-i krain. Biełaruska Śviatłana Kuźniacova zaniała pieršaje miesca. Jana stała pieršaj pradstaŭnicaj našaj krainy, jakaja pieramahła ŭ hetym konkursie za 20 hadoŭ jaho isnavańnia.

Ź inšymi ŭdzielnicami konkursu «Misis Ziamny šar». Fota: Facebook

«Misis Ziamny šar» — nie adziny tytuł u skarboncy biełaruskaj pryhažuni. U 1998 hodzie jana, tady jašče studentka matematyčnaha fakulteta HrDU Śviatłana Kruk, pieramahła ŭ pieršym nacyjanalnym konkursie pryhažości «Mis Biełaruś». Paźniej Śviatłana pryhadvała, što ŭ jakaści pryza tady atrymała 300 dalaraŭ i elektračajnik.

Z Alaksandram Łukašenkam. Fota: Facebook

Niekatory čas paśla pieramohi na konkursie Śviatłana pracavała madellu, piša Tut.by. U jakaści «Mis Biełaruś» jana pradstaŭlała našu krainu na «Mis Jeŭropa» ŭ 1999 hodzie i «Mis śvietu» ŭ 2000-m. Paśla zamužža ŭziała proźvišča muža i pierajechała ŭ Maskvu. Ciapier Śviatłana Kuźniacova vychoŭvaje traich dziaciej i pracuje nastaŭnicaj matematyki ŭ himnazii.