Уладзімір Кондрусь спрабаваў ускрыць сабе вены ў зале суда
У судзе Маскоўскага раёна Мінска 16 лістапада пачаўся разгляд справы Уладзіміра Кондруся — удзельніка Плошчы-2010, якога затрымалі праз 5 гадоў і судзяць за ўдзел у масавых беспарадках. Яму пагражае да 8 гадоў пазбаўлення волі.
16.11.2016 / 12:33
Кондрусь, трапіўшы ў клетку ў зале суда, амаль адразу лёг на падлогу.
Працэс па справе, па вялікім рахунку, так і не пачаўся як след. Суддзя Святлана Бандарэнка не паспела абвесціць склад суда, як вырашыла зрабіць перапынак — Уладзімір Кондрусь, трапіўшы ў клетку, зрабіў сабе на падлозе імправізаваны ложак з уласнага верхняга адзення і лёг на яго, заклаўшы рукі за галаву.
Размова з адвакатам плёну не дала — Кондрусь працягваў ляжаць «у знак пратэсту супраць свайго крымінальнага пераследу», як сказаў яго адвакат Вадзім Мушынскі. Суддзя вырашыла выклкікаць хуткую, каб праверыць, што ляжанне не залежыць ад стану здароўя абвінавачанага.
Урачы зацвердзілі, што стан Кондруся прымальны. Вярнуўшыся ў клетку пасля агляду, Кондрусь ізноў лёг на падлогу, а праз пару хвілінаў і ўвогуле пасправаў ускрыць сабе вены. Яго спынілі міліцыянты, вывелі з залы суда. Суддзя Бандарэнка прызначыла Кондрусю псіхолага-псіхіятрычную экспертызу — і суд скончыўся.
Бацькі Кондруся, у якіх да гэтага было толькі адно спатканне з сынам, яго так і не пабачылі. Іх выклікалі як сведкаў, таму яны сядзелі пад дзвярыма залі суда. А да выкліку сведкаў у працэсе справы так і не дайшлі.
Падрабязней чытайце ў анлайн-трансляцыі, якую «Наша Ніва» вяла з залы суда:
10:00
Сённяшняе пасяджэнне будзе весці суддзя Святлана Бандарэнка.
На працэсе прадугледжаныя надзвычайныя меры бяспекі. Уваход адбываецца праз рамку металашукальніка, усіх пільна абшукваюць і здымаюць на відэа. Партатыўная відэакамера прышпілена нават да курткі аднаго з міліцыянтаў у цывільным, які праглядае асабістыя рэчы тых, хто прыйшоў на працэс.
На працэс прыйшлі палітыкі Мікалай Статкевіч з жонкай Марынай Адамовіч, Павел Севярынец і блогер Эдуард Пальчыс.
На суд прыйшлі Мікола Статкевіч і Павел Севярынец.
10:30
Працэс пачынаецца.
«Слава герою!» — выклікнуў Статкевіч, калі Кондруся ўвялі ў залу.
Так сёння выглядае Уладзімір Кондрусь.
У сваю чаргу, Кондрусь, трапіўшы ў клетку ў залі суда, адразу зрабіў сабе на падлозе імправізаваны ложак з уласнага верхняга адзення і лёг на яго, заклаўшы рукі за галаву.
Суддзя Бандарэнка адразу ж абвясціла 10-хвілінны перапынак, каб адвакат Мушынскі пагаварыў з Кондрусем пра яго паводзіны. Аднак пасля кароткай размовы Кондрусь вярнуўся на свой «ложак».
Кондрусю пагражае зняволенне за «ўдзел у масавых беспарадках».
11:00
Такім чынам прайшло каля 20 хвілін. Нічога не змянілася: Кондрусь ляжыць на падлозе, адвакат Мушынскі сядзіць за сталом. Суддзя адсутнічае, нягледзячы на тое, што перапынак планаваўся 10-хвілінны.
Тым часам Павел Севярынец пайшоў «у народ».
«Палова беларускага народу так ляжыць, — абвясціў ён міліцыянтам. — А вы гэта ахоўваеце!».
На міліцыянтаў яго прамова аніяк не паўздзейнічала.
11:00
Падняць Кондруся паспрабаваў і Мікола Статкевіч.
«Уладзімір, захварэеш, ідзі на лаўку прыляж!» — параіў ён. Але Уладзімір не ўстаў.
11:05
Нарэшце вярнулася суддзя Бандарэнка.
«Вы можаце штосьці сказаць? Якія праблемы са здароўем?» — пацікавілася яна ў Кондруся.
У адказ — маўчанне.
Адвакат узгадаў пра тое, што Кондрусь у СІЗА знаходзіцца пад наглядам медыкаў. Але асабіста яму, здаецца, абвінавачаны на здароўе не скардзіўся.
Суддзя абвясціла яшчэ адзін перапынак — вырашылі выклікаць Кондрусю хуткую дапамогу.
Невядома, што з ім. Але, ва ўсякім выпадку, выглядае гэта як свядомы пратэст, а не як наступствы хваробы.
Усіх вывелі з залы.
«Я цябе вельмі люблю!» — выгукнула Уладзіміру яго сястра. Той не варухнуўся.
11:15
Тым часам бацькі Кондруся чакаюць у фае — яны выступаюць як сведкі і не могуць прысутнічаць на працэсе, пакуль іх не выклічуць.
Уладзімір Расціслававіч і Галіна Васільеўна Кондрусі — бацькі Уладзіміра.
11:30
Адвакат Мушынскі пацвердзіў, што Кондрусь ляжыць на падлозе не праз праблемы са здароўем.
«Ён мне сказаў, што гэта пратэст, — паведаміў «Нашай Ніве» Мушынскі. — Кондрусь пратэстуе супраць свайго крымінальнага пераследу».
Прагназаваць, чым скончыцца справа, Мушынскі не рашыўся.
11:37
Прыехала хуткая. Дактары ў зале суда.
11:45
Журналістаў пусцілі ў залю суда. Клетка пустая — Кондруся няма.
12:00
Уводзяць Кондруся.
Суддзя:
«Па стане здароўя Уладзімір Кондрусь можа удзельнічаць у працэсе».
А сам абвінавачаны тым часам ізноў лягае на падлогу.
Суддзя Бандарэнка робіць яму заўвагу і пагражае выдаліць з пасяджэння. Той не рэагуе.
«Вены рэжа!» — выгукнуў міліцыянт.
Міліцыя ўляцела ў клетку. Бачна, што Кондрусь чымсьці чыркае па руцэ. Міліцыянты трымаюць яго за рукі.
У зале паніка — сваякі Кондруся лямантуюць. Міліцыя крычыць: «Пакіньце, усе, залу!»
Севярынец крычыць: «Міліцыя, вы дапамагаеце бандытам!»
12:11
«Божа, божа, якія звяры!», — плача сястра Кондруся. Статкевіч адгаворвае яе ісці да бацькоў абвінавачанага, бо сур'ёзныя пашкоджанні ён сабе нанесці не паспеў. Севярынец працягвае крычаць штосьці ў бок міліцыі.
Плача і цётка Кондруся, і нават Марына Адамовіч, жонка Статкевіча.
Пракурор пасміхнулася, калі выходзіла з залы.
«Чаму вы смяецеся? Калі б такое адбылося з вашым дзіцём?», — пракрычала ёй у спіну сястра Кондруся.
12:18
Тым часам Севярынец прапаведуе міліцыянтам:
«Прыходзьце дамоў, маліцеся, а потым бярыце чысты аркуш паперы і пішыце рапарты аб звальненні. Падумайце, каму вы служыце!».
Міліцыя заяўляе:
«Абвінавачанаму аказалі медыцынскую дапамогу, яго жыццю нічога не пагражае».
Міліцыя і супрацоўнікі суда заклікаюць усіх выйсці з залы. Ніхто не рэагуе. Сваякі Кондруся заяўляюць, што будуць чакаць суддзю.
Святлана Бандарэнка, суддзя, выйшла, калі вывелі Кондруся.
12:40
Людзі працягваюць сядзець у зале. Суддзя Бандарэнка так і не выйшла. Афіцыйна перапынак не абвешчаны.
13:00
Сакратары кажуць, што абвешчаны перапынак. Але нічога не мяняецца — людзі па-ранейшаму сядзяць у зале. Суддзя так і не выйшла. Ці працягнецца сёння пасяджэнне, невядома.
13:06
Суддзя вяртаецца. Пасяджэнне працягнецца без Кондруся, які «выдалены за парушэнне парадку». Севярынец і Статкевіч дэманстратыўна сыходзяць.
Суддзя Бандарэнка вырашае прызначыць Кондрусю псіхолага-псіхіятрычную экспертызу.
Пасяджэнне працягнецца, калі будуць вядомыя вынікі. Гэта значыць, на сёння працэс скончаны.
Дарэчы, бацькі Кондруся сына так і не пабачылі - да сведкаў сёння справа не дайшла. Увесь час яны так і прасядзелі пад залай суда.
* * *
Нагадаем, што жыхар пасёлка Рудзенск Уладзімір Кондрусь 1977 года нараджэння быў узяты пад варту 14 чэрвеня ў межах папярэдняга расследавання за яго меркаваны ўдзел у падзеях каля Дома ўрада падчас выбараў прэзідэнта ў 2010 годзе. Ён абвінавачваецца па артыкуле 293 Крымінальнага кодэкса «Масавыя беспарадкі», па якім у 2011 годзе было асуджана 49 чалавек, многія з пазбаўленнем волі на розныя тэрміны. На час следства ён утрымліваецца ў СІЗА №1 Мінска.
Бацькі, сястра і адвакат Уладзіміра не могуць распавесці СМІ падрабязнасці справы — яны далі падпіску аб неразгалошванні.
Сам Уладзімір амаль два месяцы адмаўляўся ад ежы, пасля чаго стан яго здароўя моцна пагоршаў: ён не мог нават самастойна хадзіць.
Праваабаронцы прызналі Уладзіміра Кондруся палітвязнем.
Бацькі Уладзіміра Кондруся саромеюцца прасіць аб фінансавай дапамозе, але аплочваць адваката пенсіянерам няпроста. Калі хтосьці захоча дапамагчы Кондрусям — кантакты бацькоў ёсць у Рэдакцыі «Нашай Нівы» (nn@nn.by).