Łukašenka — Bierdymuchamiedavu: My pacichu pačynajem pierajmać usio najlepšaje ŭ vas
11.05.2016 / 13:48
president.gov.by
Biełaruś hatova abmierkavać z Turkmienistanam šyroki śpiektr pytańniaŭ uzajemavyhadnaha supracoŭnictva «va ŭmovach niaprostaj situacyi ŭ śviecie», zajaviŭ Alaksandr Łukašenka 11 maja na sustrečy z turkmienskim kaleham Hurbanhuły Bierdymuchamiedavym u vuzkim składzie.
Jon padkreśliŭ, što rady ŭ čarhovy raz vitać Bierdymuchamiedava ŭ Biełarusi, i «z zadavalnieńniem» adznačyŭ, što zaŭsiody rady byvać na turkmienskaj ziamli. «Mianie zaŭsiody ŭražvaje navizna ŭ Ašchabadzie, i my pacichu pačynajem pierajmać usio lepšaje ŭ vas. U toj ža čas my hatovyja i dzielimsia z vami svaim pieradavym vopytam».
Łukašenka adznačyŭ, što na pieramovach treba budzie razhledzieć dvuchbakovaje supracoŭnictva, a taksama «situacyju ŭ śviecie i toje, jak jana ŭpłyvaje na biełaruska-turkmienskija adnosiny i što nam treba zrabić jašče, kab pieraadoleć tyja niehatyŭnyja źjavy, jakija ŭpłyvajuć na nas, i nie dapuścić bolšaha ŭpłyvu na našy krainy».
Jon akcentavaŭ uvahu «na toj niaprostaj situacyi, jakaja składvajecca ŭ śviecie». «I my — tyja dziaržavy, jakija zaležać ad suśvietnaj kanjunktury, chto bolš, chto mienš, i niama, napeŭna, u śviecie dziaržavaŭ, jakija b nie zaležali, — zajaviŭ Łukašenka. — Heta značyć abjom pytańniaŭ dla abmierkavańnia jość, i jon niemały. I čym bolš my sustrakajemsia, tym bolš źjaŭlajecca pytańniaŭ, jakija my paśpiachova abmiarkoŭvajem, prymajem rašeńni i reahujem».
U svaju čarhu Bierdymuchamiedaŭ adznačyŭ, što Biełaruś i Turkmienistan majuć padobnyja pazicyi na mižnarodnaj arenie, u pryvatnaści «ŭ pytańni nieabchodnaści zabieśpiačeńnia stabilnaści i biaśpieki va ŭsim śviecie».
Jon taksama padziakavaŭ Łukašenku za ŭdzieł u mižnarodnaj kanfierencyi «Palityka niejtralitetu: mižnarodnaje supracoŭnictva ŭ imia miru, biaśpieki i raźvićcia» ŭ Turkmienistanie ŭ śniežni 2015 hoda i «vysoka acaniŭ jaho vystupleńnie na hetym forumie».
Bierdymuchamiedaŭ zaprasiŭ biełaruskaha kalehu ŭziać udzieł u mižnarodnym forumie pa pytańniach raźvićcia tranzitnych transpartnych kalidoraŭ, jaki projdzie ŭ Turkmienistanie ŭ hetym hodzie.
Akramia taho, turkmienski prezident spyniŭsia na ekanamičnym supracoŭnictvie dźviuch krain. Pavodle jaho słoŭ, budaŭnictva na terytoryi Turkmienistana Harłykskaha horna-abahačalnaha kambinata pryniasie Biełarusi i Turkmienistanu «vielmi dobryja ekanamičnyja dyvidendy».
Bierdymuchamiedaŭ «z zadavalnieńniem adznačyŭ dobruju pracu mižuradavaj kamisii pa handlova-ekanamičnym supracoŭnictvie» i vykazaŭ nadzieju, što Biełaruś i Turkmienistan znojduć reziervy dla pavieličeńnia ŭzajemnaha tavaraabarotu. Prezident Turkmienistana taksama padziakavaŭ biełaruskamu boku «za padrychtoŭku vysokakvalifikavanych kadraŭ ź liku turkmienskaj moładzi ŭ biełaruskich VNU».
Bierdymuchamiedaŭ prybyŭ u Biełaruś z dvuchdzionnym aficyjnym vizitam 11 maja. Pavodle infarmacyi pres-słužby biełaruskaha prezidenta, pa vynikach pieramoŭ Łukašenka i Bierdymuchamiedaŭ padpišuć sumiesnuju zajavu, nakiravanuju na «dalejšaje ŭmacavańnie ŭzajemavyhadnaha biełaruska-turkmienskaha supracoŭnictva». U prysutnaści lidaraŭ dźviuch krain taksama budzie padpisany šerah inšych dvuchbakovych dakumientaŭ.
Čakajecca, što prezident Turkmienistana pasadzić dreva na Alei hanarovych haściej kala Pałaca Niezaležnaści i razam sa svaim biełaruskim kaleham voźmie ŭdzieł u cyrymonii adkryćcia kompleksu budynkaŭ pasolstva Turkmienistana ŭ Minsku.