LG anansavała 98-calevy televizar z 8K-pašyreńniem
03.01.2016 / 19:18
Ad 6 da 9 studzienia ŭ Łas-Viehasie projdzie adna z najbujniejšych štohadovych mižnarodnych vystaŭ spažyvieckaj elektroniki — Consumer Electronics Show (CES) 2016. Adnak niekatoryja navinki kampanii pačynajuć anansavać zahadzia.
Tradycyjna praktyčna ŭsie karty pierad amierykanskim anonsam raskryła LG. U pryvatnaści, havorka idzie pra jaje novuju liniejku televizaraŭ na čale z fłahmanskim UH9800.
LG UH9800 - 98-calevy televizar z pašyreńniem ekrana 8K (7680 × 4320 piksielaŭ). Heta pašyreńnie ŭ 4 razy vyšej, čym u papiarednim standarcie telebačańnia zvyšvysokaj vyraznaści (4K), jaki da hetaha času nie atrymaŭ šyrokaha raspaŭsiudžvańnia ŭ śviecie.
Na dadzieny momant karejskaja kampanija paviedamlaje ab tym, što UH9800 hatovy da pačatku masavaj vytvorčaści, a pieršyja jaho adhruzki zapłanavany na druhuju pałovu hetaha hoda.
Ažyjatažu, zrešty, čakać nie varta: u minułym hodzie svoj 8K-televizar pradstaviła kampanija Sharp, cana pryłady skłała niemałyja 130 tysiač dalaraŭ. Małavierahodna, što LG UH9800 abyjdziecca pakupnikam našmat tańniej.
Akramia 8K-fłahmana, LG raspaviała i pra bolš prostyja 4K-madelach. Sieryi UH8500 (ad 55 da 75 calaŭ) i UH9500 (55-86 calaŭ) padtrymlivajuć technałohiju Color Prime Plus, jakaja dazvalaje pieradavać maksimalna naturalnyja kolery. Akramia taho, televizary hetych sieryj i bolš tannaj UH7700 (49-65 calaŭ) padtrymlivajuć technałohii pavieličeńnia kantrastu True Black i Contrast Maximizer.
Televizary liniejki UH9500 da taho ž vielmi tonkija (kala 5,5 mm) i asnaščany mahutnym hukam Harman / Kardon. Usie navinki pracujuć pad kiravańniem webOS 3.0.