Nuli «Nastaśsi Słuckaj»
Sajt BulletinOnline.org paviedamiŭ sensacyjnyja źviestki: chałodna pryniataja biełaruskimi hledačami «Nastaśsia Słuckaja» sabrała ŭ Rasiei 7 miljonaŭ dalaraŭ kasy. «Kudy hladzić biełaruskaja prakuratura?» — pytajecca aŭtar artykułu Jaŭhien Krastoŭski.
18.03.2008 / 11:24
Stvorany biełarusami ŭ 2003 hodzie histaryčny mastacki film «Nastaśsia Słuckaja» byŭ pradadzieny rasiejskaj kampanii za ścipłyja 8 z pałovaj tysiačaŭ dalaraŭ. Novyja ŭładalniki stužki pamianiali nazvu filmu na «Kniahinia Słuckaja» j zapuścili jaje ŭ rasiejskija handlovyja sietki. Užo ŭ 2005-m z Rasiei dajšli źviestki pra pośpiech karciny, ale nazvanaja BulletinOnline.org suma zboraŭ u bolš jak 7 miljonaŭ dalaraŭ nia moža nia ŭražvać.
Aŭtar artykułu nie nazyvie krynicy infarmacyi, tamu nazvanaj sumie niaprosta dać viery. U internecie składana znaści choć jakija vodhuki hledačoŭ karciny, aŭtarytetny rejtynh IMDB nabraŭ usiaho 8 hladackich hałasoŭ, dy i tyja acanili film vielmi pasredna. Padobnyja vyniki hladackaj uvahi demanstruje i rasiejski kinopoisk.ru.
Časopis Total DVD u svaim ahladzie źviartaje ŭvahu na nizkuju jakaść dysku i daje nastupnuju charaktarystyku samomu filmu: «Zamiest novaha słova ŭ historyi biełaruskaha kino atrymałasia karcina ŭ najhoršych tradycyjach savieckich histaryčnych stužak — siužetna niaŭciamnaja, z pa-amatarsku pastaŭlenymi bajami, klaŭstrafabičnymi bujnymi planami i trešavaj «aholenkaj»…»
Dla paraŭnańnia, šyroka razreklamavany, vysokabiudžetny rasiejski film histaryčnaj tematyki «1612» mieŭ nieparaŭnalna bolšuju aŭdytoryju, prakat i reakcyju, a tym nia mienš nie nabraŭ ahułam i 6 miljonaŭ dalaraŭ.
Jak udałosia i ci ŭdałosia słuckaj kniahini abskakać takich pavažnych kankurentaŭ, zastajecca jašče adnoj histaryčnaj zahadkaj.