Pad Navahrudkam miascovy biźniesmien pabudavaŭ niezvyčajny aŭtobusny prypynak FOTAFAKT
17.08.2015 / 21:41
Pobač z vozieram Litoŭka i adnajmiennaj vioskaj u Navahrudskim rajonie znachodzicca, mahčyma, najpryhažejšy ŭ Biełarusi aŭtobusny prypynak. Pradprymalnik Siarhiej Koval, jaki buduje pa susiedstvie dom, aformiŭ jaho pa matyvach znakamitaj paemy Adama Mickieviča «Hražyna».
Litoŭka znachodzicca ŭsiaho za 2,5 km ad rajonnaha centra i haradžanie masava pryjazdžajuć siudy ŭ vychodnyja. Spyniajucca pahladzieć na prypynak i turystyčnyja aŭtobusy.
Prypynak zrobleny z kamienia i dreva, nakryty čarotam. Na ścianie — zaviaršalny frahmient paemy Mickieviča. Zhodna z tekstam, mienavita tut prajšła apisanaja paetam lehiendarnaja bitva pamiž vojskami Navahrudskaha kniazia Litavora i Teŭtonskim ordenam, u jakoj pad vyhladam kniazia ŭdzielničała jaho žonka Hražyna. Sama scena bitvy tut taksama namalavanaja. Ź inšaha boku — stylizavanaja karta Biełarusi.
Na inicyjatyvu pradprymalnika źviarnuli ŭvahu i miascovyja ŭłady. U červieni mienavita tut, na bierahach Litoŭki, prachodziŭ rajonny Dzień moładzi, a prypynak staŭ impravizavanaj scenaj.