Abituryjentka ŭ Hrodnie vypraviła ŭ atestacie «trojku» na «piaciorku» i sprabavała pastupić za chabar
31.07.2015 / 15:36
Žycharka Hrodna 1987 hoda naradžeńnia vyrašyła pastupić u Hrodzienski dziaržaŭny miedycynski kaledž na biudžetnaje adździaleńnie. Adnak pryjomnaja kamisija nie pryniała ŭ jaje dakumienty z-za nizkaj adznaki ŭ atestacie ab siaredniaj adukacyi, bo «trojka» pa adnym z profilnych pradmietaŭ nie daje prava na ŭdzieł va ŭstupnych ispytach, u jakija pravodziacca kaledžam.
Jak paviedamiŭ aficyjny pradstaŭnik USK pa Hrodzienskaj vobłaści Siarhiej Šaršanievič, abituryjentka źviarnułasia pa dapamohu da žychara Hrodna 1994 hoda naradžeńnia. Za hrašovuju ŭznaharodu jon padrabiŭ jaje atestat, vypraviŭšy ŭ im adznaku «try» na adznaku «piać».
Paśla hetaha abituryjentka dała chabar słužbovaj asobie pryjomnaj kamisii kaledža ŭ pamiery 300 dalaraŭ, 100 jeŭra, a taksama śpirtnymi napojami i kandytarskimi vyrabami za spryjalnaje vyrašeńnie pytańnia ab paŭtornym pryjomie dakumientaŭ z padroblenym atestatam.
U dačynieńni da abituryjentki Hrodzienskim mižrajonnym adździełam Śledčaha kamiteta raspačata kryminalnaja sprava (č.1 art.431 Kryminalnaha kodeksa). Śledčyja kanfiskavali pradmiety chabaru i dakumienty abituryjentki. Pryznačanaja techničnaja ekśpiertyza.
Na majomaść padazravanaj, u tym liku na aŭtamabil, nakładzieny aryšt. Raniej da kryminalnaj adkaznaści jana nie pryciahvałasia.
Kančatkovaja pravavaja acenka dziejańniam rabotnika pryjomnaj kamisii, a taksama asoby, padazravanaj ŭ padrobcy dakumienta, budzie dadziena pa vynikach papiaredniaha rasśledavańnia.