Łukašenka zaklikaŭ Katar inviestavać u Biełaruś, zaprasiŭ emira ź vizitam
03.07.2015 / 13:41
Łukašenka zaprasiŭ u hości ŭ Biełaruś «svajho dobraha siabra» — emira Katara.
Pra heta Alaksandr Łukašenka zajaviŭ 2 lipienia na sustrečy ź dziaržaŭnym ministram pa pytańniach abarony Katara Chamadam Bien Ali Al-Atyjia, paviedamlaje pres-słužba kiraŭnika dziaržavy.
«Vy pavinny viedać i pieradajcie heta majmu dobramu siabru emiru: my hatovyja supracoŭničać z vašaj krainaj pa lubych napramkach, i my budziem zaŭsiody nadziejnym partnioram dla vas», — padkreśliŭ Alaksandr Łukašenka.
Jon ličyć ciapierašni ŭzrovień tavaraabarotu pamiž dźviuma krainami ŭ $18—20 młn śmiešnym. «My raźličvajem, što nie prosta padvoim, a na paradak pavialičym dadzieny tavarazvarot», — skazaŭ Łukašenka.
Kiraŭnik dziaržavy padziakavaŭ katarskamu boku za inviestavańnie. Jon źviarnuŭ uvahu na realizacyju Inviestycyjnym fondam Uzbrojenych sił Katara prajekta pa budaŭnictvie ŭ Minsku šmatfunkcyjanalnaha haścinična-spartyŭnaha kompleksu.
«Miarkuju, što hety abjekt zaŭsiody budzie zadziejničany, tamu što nadvorje ŭ vašaj krainie ŭ hety čas, ja liču, prosta žudasnaje dla žyćcia, i mnohija hramadzianie Katara vyjazdžajuć dla adpačynku na hety čas za miežy krainy. Mnie zdajecca, što lepšaha miesca, kab adyści ad śpioki, adpačyć i ŭ toj ža čas nie zamierznuć, lepšaha miesca, čym Biełaruś, znajści składana», — skazaŭ Alaksandr Łukašenka.
Na jaho dumku, źjaŭleńnie ŭ Minsku hramadzian Katara budzie sadziejničać pavyšeńniu servisu ŭ haściničnaj spravie, restarannym biznesie.
«Ale samaje hałoŭnaje — nie tolki turysty, ale i śpiecyjalisty, palityki i asabliva biźniesmieny buduć mieć tut, u Minsku, svoj dom, jany čaściej tut buduć byvać.
Dumaju, my adkryjem novuju staronku inviestavańnia katarskaj dziaržavy ŭ ekanomiku Biełarusi. Takim čynam my možam značna pašyryć naša supracoŭnictva», — ličyć Łukašenka.
Jon pieradaŭ zaprašeńnie emiru Katara naviedać Biełaruś. «Niachaj jon paznajomicca z našaj krainaj, pahladzić ŭsie abjekty, jakija tut vami pabudavanyja, u što ŭkładzienyja značnyja srodki, i nam budzie lahčej damaŭlacca z vašymi biźniesmienami, palitykami z nahody dalejšych krokaŭ pa pahłybleńni našaha supracoŭnictva», — adznačyŭ Alaksandr Łukašenka.
U svaju čarhu dziaržaŭny ministr adznačyŭ, što emir taksama zadavoleny prajektam i nakiravaŭ jaho ŭ Biełaruś dla abmierkavańnia mahčymaściaŭ pa pašyreńni i pahłybleńni dvuchbakovaha supracoŭnictva.