Trochhadovy Klim u Kramatorsku vyžyŭ, bo jaho prykryła svaim ciełam mama
Za žyćcio chłopčyka, maci jakoha zahinuła pry abstrele Kramatorska bajevikami, užo tydzień zmahajucca miedyki.
17.02.2015 / 15:04
U apošnija dni adzin z samych ciažkich pacyjentaŭ Kramatorskaj dziciačaj balnicy (Danieckaja vobłaść) — 3-hadovy Klim. Za hety tydzień mały paśpieŭ pieranieści toje, što pad siłu nie kožnamu darosłamu.
Vielmi žorstki abstreł, zdavałasia b, mirnaha horada 10 lutaha zastaŭ chłopčyka z mamaj za niekalki krokaŭ ad padjezda. Žančyna pabiehła pa jaho ŭ dziciačy sad, jak tolki pačuła pieršyja vybuchi. U sadku zhadvajuć: pierakonvali Sašu Klimienka pieračakać abstreły ŭ ich, ale jana rvałasia dadomu — u kvatery byŭ adzin starejšy syn.
«Saša zahinuła pa šlachu ź dziciačaha sadka, litaralna nie dabiehła da doma adzin padjezd, — raspaviała siabroŭka siamji Klimienka Natalla Stupak.
— Jana pavaliłasia na ziamlu i nakryła saboj dzicia, tolki dziakujučy hetamu jano vyžyła. U Sašy zastałosia dvoje dziaciej: Klimu — 3 hady, Savieliju — 6 hadoŭ».
Ciapier za žyćcio maleńkaha Klima zmahajucca daktary. Miedyki kažuć: kali b dzicia nie dastavili ŭ balnicu tak chutka, jano mahło b pamierci ad straty kryvi, na rachunku była kožnaja siekunda. Na ščaście, małoha ŭ akno ŭbačyła susiedka
— dzicia kryčała i sprabavała vypaŭźci z-pad mamy.
Tady žančyna razam z mužam pabiehli ŭniz, sieli ŭ mašynu i razam z maleńkim Klimam paimčali ŭ balnicu.
«Askołkami dziciaci razdrabniła abiedźvie nahi i ruku, - raspaviadajuć miedyki. — Stan stabilna ciažki, chłopčyk u reanimacyi».
Siabry siamji dadajuć: traŭmy małoha daktary dla razumieńnia paraŭnoŭvajuć z ukusam akuły — razarvanyja miakkija tkaniny, suchažylli, źviazki, pryjšłosia pierasadžvać skuru… Pra adnaŭleńnie kostak havorka pakul navat nie idzie, miedyki pracujuć nad miakkimi tkaninami.
Ciapier pad dźviaryma pałaty dobrych viestak čakajuć tata i babula Klima. Ale prahnozaŭ miedyki nie robiać.
Kažuć, nie vyklučana, što stavić na nohi chłopčyka treba budzie za miažoj. Ale ab tym, kab transpartavać jaho, havorka pakul nie idzie.
Chłopčyka ciapier nielha navat apranać — jość ryzyka, što čužaja skura nie pryžyviecca. Svajakoŭ miedyki rychtujuć da doŭhaha pracesu reabilitacyi. Jon moža zaniać mnohija miesiacy, a to i hady.
Ale voś ci budzie Klim chadzić, nichto nie viedaje.
Žadajučyja akazać pasilnuju dapamohu mohuć pieraličyć hrošy na rachunak baćki Klima, Alaksandra Klimienka: 5168 7420 2308 4688 (karta «Pryvat-banka»).