Najbujniejšy piracki sajt The Pirate Bay zakryli. Ci nazaŭsiody?
Udzień 9 śniežnia torent-trekier The Pirate Bay staŭ niedasiažnym pa ŭsim śviecie. Heta adbyłosia praz palicejski rejd na jaho sierviery ŭ Stakholmie, raspaviadaje hazieta Metro.
10.12.2014 / 14:21
Šviedskaja palicyja kanfiskavała niekalki siervieraŭ i kampjutaraŭ, ale ludziej nie zatrymała. Palicyja nie paćvierdziła, što metaj rejdu byŭ mienavita The Pirate Bay.
Razam z The Pirate Bay u afłajn syšli inšyja trekiery: EZTV, Zoink i Torrage.
Baraćba z The Pirate Bay, dzie raspaŭsiudžvajucca nielehalnyja kopii filmaŭ, muzyčnych albomaŭ, videahulniaŭ i prahram, viadziecca daŭno.
U kastryčniku byŭ zatrymany treci i apošni zasnavalnik trekiera Fredryka Nejža, viadomaha jak TiAmo, za šmatlikija parušeńni aŭtarskaha prava. Trekier błakirujecca ŭ šerahu krain.
Raniej The Pirate Bay nie raz sychodziŭ u afłajn, ale viartaŭsia chutčej čym praz 24 hadziny paśla adklučeńnia.
U vieraśni ŭładalniki sajtu zajaŭlali, što zapuścili sistemu suprać rejdaŭ, jakaja dazvolić sajtu funkcyjanavać navat u vypadku palicejskich pieratrusaŭ.
Ci kančatkova zakryli The Pirate Bay?
Natchnialnik biełaruskaha Pirackaha centru Michał Vołčak miarkuje, što hetaje pytańnie nieistotnaje. Bujnyja placoŭki kštałtu The Pirate Bay možna zakryć, ale isnuje bieźlič drabniejšych torent-trekieraŭ.
«Heta indykatar taho, što staryja padychody da aŭtarskaha prava jašče atrymlivajuć inviestycyi ad staroha biznesu na toje, kab pavalić simvały kštałtu The Pirate Bay»,
- raspavioŭ «Našaj Nivie» biełaruski pirat.
«U peŭnym sensie heta zapužvańnie. Ale dla The Pirate Bay heta ŭžo nie pieršy raz. Dumaju, u ich jość «lusterki», - miarkuje jon.
Na jaho dumku, haniacca za drobnymi torent-trekierami bieśpierśpiektyŭna. Sučasnyja technałohii (u pryvatnaści magnet-linki) dazvalajuć adnojčy skarystacca trekieram, a zatym abmieńvacca fajłami biez trecich placovak.
Da taho ž, isnujuć i alternatyvy nakštałt «hłybinnaha pavucińnia» («dark net»), dzie praktyčna niemahčyma znajści raspaŭsiudnika nielehalnaha kantentu.
Jak zmahacca z parušeńniami aŭtarskaha prava?
Na dumku Vołčaka, efiektyŭniej nie zmahacca z parušeńniami aŭtarskaha prava, a refarmavać aŭtarskaje prava i sposaby raspaŭsiudu kantentu.
Piracki centr zajmajecca padrychtoŭkaj hleby da reformy zakanadaŭstva, kansultuje hramadzian pa pytańniach aŭtarskaha prava. Siońniašniaje aŭtarskaje prava jon nazyvaje «achovaj inviestycyj», ale padkreślivaje, što karyść dla jak dla dziaržavy, tak i dla tvorcy ad hetkaj achovy sprečnaja. Jano časta nie daje zručnych dla karystalnika sposabaŭ raspaŭsiudu i spažyvańnia lehalnym kantentam.
Baraćba z žadańniem čałavieka nie płacić za kantent – sastarełaja madel na dumku Vołčaka.
«Kantent zaraz nie zaŭsiody ŭsunieš biaspłatna, a patrabavać za jaho płacić… Heta nie padychodzić da siońniašnich realij u siecivie»,
— kaža jon.
Kali čałaviek maje mahčymaść zdabyć niešta biaspłatna, jon zdabudzie, miarkuje Vołčak. «Haniacca za hetym niama pierśpiektyŭ. Lepiej prydumać, jak heta zrabić zručna», — śćviardžaje jon.
Navat kali karystalnik nie suprać zapłacić, časta jamu praściej spampavać nielicenzijnuju kopiju, čym znajści dostup da licenzijnaj.
U jakaści prykładu jon pryvodzić servisy patokavaha videa ci aŭdyjo, dzie karystalnik płacić nie za kantent, a za karystańnie zručnym siervisam. Padobnyja biznes-madeli ŭžo majuć peŭny pośpiech, ale sučasnaje aŭtarskaje prava časam zaminaje ich šyrokamu raspaŭsiudu.