Jak Łukašenka «tych, chto praviniŭsia», pierasadžvaje z pasady na pasadu
14.11.2014 / 18:39
Padčas naviedvańnia Hrodna Alaksandr Łukašenka siońnia zapatrabavaŭ «karać tych, chto pierasadžvaje z kresła na kresła kiraŭnikoŭ, što pravalili spravu».
«Bolš za ŭsio niedapuščalna, kali kiraŭniki, vyzvalenyja ad zajmajemaj pasady za toje, što pravalili ŭčastak pracy, u tym liku ździejśnili pravaparušeńni, pierasadžvajucca z adnaho kirujučaha kresła ŭ inšaje, — zajaviŭ Łukašenka. — Za heta spahnańnie budzie žorstkim».
«Naša Niva» ŭzhadała piać vypadkaŭ, kali sam kiraŭnik Biełarusi chutka mianiaŭ hnieŭ na miłaść, dajučy «niadbajnym» čynoŭnikam i mieniedžaram novyja pasady.
Ci možna patrabavać hetaha ad kiraŭnikoŭ drabniejšaha ranhu, kali ŭłasny prykład nie biezdakorny?
Michaił Rusy
Zvolnieny za falsifikacyju: U 2003 hodzie tahačasny ministr sielskaj haspadarki Michaił Rusy byŭ zvolnieny z pasady z nastupnaj farmuloŭkaj: «Za nievykanańnie daručeńniaŭ kiraŭnika dziaržavy ab zabieśpiačeńni poŭnaj i svoječasovaj vypłaty zarabotnaj płaty rabotnikam ahrapramysłovaha kompleksu i pahašeńni zapazyčanaści pierad nasielnictvam i sielskahaspadarčymi arhanizacyjami za zdadzienuju sielskahaspadarčuju pradukcyju, a taksama za falsifikacyju spravazdačnych danych pa hetych pytańniach». Łukašenka navat kazaŭ, što Rusy «ździekujecca ź sialan».
U budučyni: U toj samy 2003 hod Michaiła Rusaha adpravili daradcam adździalenia pasolstva Biełarusi ŭ Sankt-Pieciarburh. Ad 2004 hoda – deputat pałaty pradstaŭnikoŭ. I voś fint: u 2010 hodzie Rusy znoŭ pryznačany ministram sielskaj haspadarki.
Siońnia: U krasaviku 2012 Rusy ŭvohule pajšoŭ na pavyšeńnie. Ciapier jon vice-premjer, jaki kuryruje pytańni sielskaj haspadarki.
Leanid Malcaŭ
Zvolnieny za pjanstva: «Za ŭčynak, jaki dyskredytuje vajskovaje zvańnie aficera (źjaŭleńnie ŭ hramadskim miescy ŭ niećviarozym stanie)». 31 kastryčnika 1996 hoda Leanid Malcaŭ vystupaŭ pierad studentami minskaha miedinstytuta. Łukašenku, jaki prysutničaŭ u zale, padałosia, što Malcaŭ pjany. Kažuć, što Łukašenka tady navat skazaŭ: «Pierad vami tolki što vystupaŭ były ministr abarony».
U budučyni: Praz paru miesiacaŭ Malcaŭ byŭ pryznačany pieršym namieśnikam načalnika štaba pa kaardynacyi vajskovaha supracoŭnictva dziaržavaŭ-udzielnic SND. U 2000-m jaho viarnuli va ŭładu, pryznačyŭšy namieśnikam dziaržsakratara Rady biaśpieki. A ŭ 2001-ym Malcaŭ viarnuŭsia na pasadu ministra abarony.
Siońnia: Apošni hod Malcaŭ zajmaje pasadu kiraŭnika pamiežnaha kamiteta.
Alaksandr Baroŭski
Zvolnieny za złoŭžyvańnie słužbovymi paŭnamoctvami: 27 sakavika 2008 hoda Viarchoŭny sud Biełarusi pastaviŭ kropku ŭ kryminalnaj spravie byłoha staršyni kancernu «Biełnaftachim» Alaksandra Baroŭskaha. Mieniedžar byŭ asudžany na 5 hadoŭ turmy pa artykule 424 častka 2 KK: «Naŭmysnaje nasupierak intaresam słužby ździajśnieńnie słužbovaj asobaj z karyślivaj ci inšaj asabistaj zacikaŭlenaści dziejańniaŭ z vykarystańniem svaich słužbovych paŭnamoctvaŭ, što paciahnuła pryčynieńnie škody ŭ bujnym pamiery abo istotnaj škody pravam i zakonnym intaresam hramadzian albo dziaržaŭnym abo hramadskim intaresam (złoŭžyvańnie ŭładaj abo słužbovymi paŭnamoctvami)».
U budučyni: U śniežni taho ž hoda Alaksandr Baroŭski byŭ pamiłavany Alaksandram Łukašenkam i vyzvaleny z turmy. A jašče praz hod – u śniežni 2009 – Baroŭskaha pryznačyli hienieralnym dyrektaram MAZa. U krasaviku 2012-ha Baroŭski z ruk Alaksandra Łukašenki atrymaŭ adnu z najbolš prestyžnych uznaharod Biełarusi – orden Pašany.
Siońnia: Vyjšaŭ na piensiju.
Ihar Račkoŭski
Zvolnieny za plušavy desant: 31 lipienia 2012 hoda Alaksandr Łukašenka adpraviŭ u adstaŭku kiraŭnika pamiežnaha kamiteta Ihara Račkoŭskaha. Aficyjnaja farmuloŭka: «Za nienaležnaje vykanańnie słužbovych abaviazkaŭ pa zabieśpiačeńni nacyjanalnaj biaśpieki Respubliki Biełaruś». Sprava ŭ tym, što ŭ pačatku lipienia taho hoda na terytoryju Biełarusi nielehalna zalacieŭ šviedski «miedźviedziroŭščyk». Ź jaho borta na terytoryju Vałožynskaha rajona i Minska skidvali plušavych miadźviedzikaŭ z ulotkami ab parušeńni pravoŭ čałavieka ŭ Biełarusi. Hetaksama biespakarana samalot źlacieŭ nazad na terytoryju Litvy.
U budučyni: U toj samy hod Račkoŭski staŭ pieršym vice-prezidentam Nacyjanalnaha alimpijskaha kamitetu. Heta značyć, namieśnikam samoha Łukašenki.
Siońnia: Nie tak daŭno Ihar Račkoŭski ŭznačaliŭ Fiederacyju chakieja Biełarusi.
Viktar Šejman
Zvolnieny za vybuch na Dzień respubliki: 3 lipienia 2008 hoda kala steły «Minsk – horad-hieroj» prahučaŭ vybuch. Śmiarotnych vypadkaŭ nie było, ale šmat kaho pakalečyła. Na naradzie ŭ kiraŭnika dziaržavy praz čatyry dni Łukašenka źviarnuŭsia da tahačasnaha dziaržsakratara Rady biaśpieki Viktara Šejmana: «Nie dumaju, što Vy pavinny zastavacca na hetaj pasadzie paśla incydentu. Vy vinavatyja, pierš za ŭsio! Vy pavodle daručeńnia prezidenta nie adzin hod, a dziesiać hadoŭ arhanizujecie padobnyja mierapryjemstvy. I ničoha nie zrabili!» Nazaŭtra Šejman sapraŭdy byŭ zvolnieny, ale dziela spraviadlivaści varta skazać, što z farmuloŭkaj: «U suviazi ź pieravodam na inšaje miesca pracy».
U budučyni: Spačatku Šejman staŭ pamočnikam Łukašenki pa asablivych daručeńniach. Na hetaj pasadzie jon časta źjaŭlaŭsia ŭ krainach Afryki i Paŭdniovaj Amieryki.
Siońnia: Ad zimy 2013-ha ŭznačalvaje Kiravańnie spravami prezidenta.