Lockheed Martin abiacaje kamiercyjny termajadzierny reaktar usiaho praz 10 hadoŭ
16.10.2014 / 11:28
Fota Lockheed Martin.
Amierykanskaja kampanija Lockheed Martin, najbolš viadomaja vytvorčaściu samalotaŭ, zajaviła pra mahčymaść prezientavać pracoŭny pratatyp reaktara termajadziernaha sintezu ciaham piaci hadoŭ.
A jašče praź piać hadoŭ paśla źjaŭleńnia pratatypa mahčyma naładzić sieryjny vypusk termajadziernych siłavych ustanovak.
Lidar prajektnaj kamandy Tomas Makhvajr kaža, što reaktar mahutnaściu 100 MVt pa pamiery budzie nie bolšym za standarny marski hruzavy kantejnier.
Termajadziernaja reakcyja zaklučajecca ŭ źlićci atamnych jadzier z vysvabadžeńniem vialikaj enierhii. U naturalnych umovach takija reakcyi adbyvajucca ŭ zorkach. Dla ažyćciaŭleńnia reakcyi termajadziernaha sintezu nieabchodnaja tempieratura ŭ sotni miljonaŭ hradusaŭ Celsija. Utrymlivać raspalenuju da takoj tempieratury płazmu možna z dapamohaj zvyšmahutnych mahnitaŭ. U prajektujemym Lockheed Martin reaktary musić adbyvacca źlićcio dvuch izatopaŭ vadarodu: dejteryju i trytyju.
Reakcyja termajadziernaha sintezu ličycca bolš kiravanaj i ekałahičnaj za reakcyju radyjeaktyŭnaha raspadu, što vykarystoŭvajecca ciapier AES. Ale na šlachu jaje vykarystańnia byli svaje pieraškody.
Kali Lockheed Martin sapraŭdy zmoža vyrabić prydatnuju dla kamiercyjnaha vykarystańnia ŭstanoŭku ŭ taki ścisły termin, heta stanie sapraŭdnaj revalucyjaj u halinie enierhietyki. Reaktary termajadziernaha sintezu zastajucca adnym z samych pierśpiektyŭnych šlachoŭ atrymańnia tannaj i ekałahična čystaj enierhii, adnak pakul u čałaviectva niama prydatnych dla vykarystańnia ŭstanovak, a tyja, što budujucca ci prajektujucca, (naprykład, ITER u Francyi ci Wendelstein 7-X u Hiermanii) pryznačany ŭ pieršuju čarhu dla daśledčych metaŭ.