Паводка заблакавала дзве вёскі на Гомельшчыне
12.04.2013 / 16:20
Вёскі Таргошын і Белін Петрыкаўскага раёна ў выніку паводкі адрэзаныя ад аўтамабільных зносін.
Паводле інфармацыі спецыялістаў, у дзвюх вёсках пражываюць каля 40 чалавек. У раёне гэтых населеных пунктаў арганізаваны кругласутачны пост МНС, які знаходзіцца на пастаяннай сувязі з жыхарамі. Акрамя таго, тут наладжана дастаўка чоўнамі прадуктаў, медыцынскіх прэпаратаў і іншых сродкаў першай неабходнасці.
У эвакуацыі людзей неабходнасці няма.
У райвыканкаме дадалі, што для паляпшэння камунікацыі на тэрыторыі раёна ўжо арганізаваны два маршруты рэгулярных лодачных перапраў на рацэ Убарць. Яны звязваюць 6 вёсак з «вялікай зямлёй». На выпадак пагаршэння паводкавай абстаноўкі ў раёне вызначаны месцы размяшчэння насельніцтва, а таксама створаны брыгады, якія будуць дапамагаць людзям падчас эвакуацыі.