30. Аляксандр Косінец
Старшыня Віцебскага аблвыканкама.
22.03.2013 / 15:46
Доктар медыцынскіх навук Аляксандр Косінец дасягнуў сваёй кар’ернай вяршыні ў сярэдзіне 2000-х, калі яго, рэктара абласнога медуніверсітэта, закінулі адразу ў фатэль віцэ-прэм’ера. Косінец узяўся там за працу з такім імпэтам, што ў 2008 быў ад граху далей адпраўлены назад на Віцебшчыну.
Там Косінец загарэўся ідэяй пабудаваць Дыснэйлэнд коштам $100 мільёнаў. Нягледзячы на крызіс, ён насіўся са сваёй задумай як з пісанай торбай некалькі гадоў, ды ўсё марна. Наступная глабальная ідэя — аднаўленне апусцелага віцебскага аэрапорта.
Энтузіязму Косінца хапае на многае, балазе ў вобласці ёсць багаты «Нафтан» і абавязковы «Славянскі базар».
***
Цытата: «У сельскай гаспадарцы рэнтабельнасць 7,6%. З датацыямі. Калі без датацый, было б мінус 7,6%».
Аляксандру Лукашэнку, 2011.
***
Аб’ектыўка
Нар. у 1959 у вёсцы Роскі Сялец на Аршаншчыне. Закончыў Віцебскі дзяржаўны медыцынскі інстытут (1982), у якім працаваў да 1994. У 1995—1997 — кіраўнік РНПЦ «Інфекцыя і хірургія», у 1997—2005 — рэктар Віцебскага дзяржаўнага медыцынскага ўніверсітэта, у 2005—2008 — віцэ-прэм’ер. Старшыня Віцебскага аблвыканкама (ад 2008).