На праекты Чыжа і Тарнаўскага таксама няма грошай: праблемы з Зялёным Борам

Аляксандр Лукашэнка не даў грошай на стварэнне яго інжынернай інфраструктуры.

30.11.2012 / 10:09

Гэты раён планавалася ўзвесці недалёка ад Мінска. Пра гэта беларускі кіраўнік заявіў 29 лістапада на нарадзе па развіцці жыллёвага будаўніцтва ў сталіцы.

Нагадаем, што

першапачаткова ў 2008 годзе планавалася, што забудову тэрыторыі ў раёне пасёлка Калодзішчы, дзе, у прыватнасці, размяшчаецца ваенны палігон, ажыццявяць кампаніі «Трайпл» і «Юнівест-М», падкантрольныя Юрыю Чыжу і Анатолю Тарнаўскаму адпаведна. У гэтых прадпрымальнікаў была задума стварыць мікрараён з нізкапаверхавай забудовай. Аднак працы тут так і не пачаліся.

Як далажыў 29 лістапада на нарадзе па гэтым пытанні старшыня Камітэта дзяржкантролю Аляксандр Якабсон,

галоўная праблема — будаўніцтва інжынернай інфраструктуры, на якую неабходна 4 млрд даляраў, паводле разлікаў праектавальнікаў.
«Сёння гадавы бюджэт горада Мінска складае 33 трлн рублёў. З бюджэту горада на ўсю інфраструктуру Мінска вылучаецца каля 1 трлн. Таму казаць пра тое, што Мінск зможа калісьці сваімі сіламі зрабіць гэтую інфраструктуру, не даводзіцца. Безумоўна, патрабуецца ўдзел рэспубліканскага бюджэту», — адзначыў Якабсон. Паводле яго словаў, затраты на асваенне 1 кв.м гэтай тэрыторыі будуць складаць 1672 даляраў, у той час як на звычайнай тэрыторыі — да 1 тысячы даляраў.
Лукашэнка падкрэсліў, што разлічваць на вылучэнне такой сумы з бюджэту не варта: «Я не збіраюся будаваць інфраструктуру за 4 млрд даляраў, каб заўтра туды прыйшоў бізнэс і зарабіў нармальныя там грошы.
Я гэтага рабіць не буду. Як быццам у нас няма дзе больш у краіне будаваць дарогі, газ пракладаць і электрычныя сеткі! Ды мы паўкраіны падымем за 4 млрд даляраў!»

«Мне здаецца, у Мінску маса праблем, на рашэнне якіх трэба выдаткаваць грошы. Таму няма чаго лезці сёння ў Зялёны Бор, калі няма грошай, — падкрэсліў ён. — Будзе няправільна з майго боку, калі я сёння ўкладу гэтыя грошы ў Зялёны Бор. Хай нават не 4 млрд даляраў, а ўдвая менш. Колькі вёсак, малых гарадоў за гэтыя грошы прывядзем у парадак! Але і не гэта галоўнае сёння. Інвестыцыі ў асноўны капітал, у вытворчасць — вось у што сёння трэба ўкладаць грошы. Я колькі прадпрыемстваў ствару, якія прынясуць грошы! Гэта важней для мяне сёння, чым укладваць туды ў інфраструктуру».

Як адзначыў віцэ-прэм’ер Анатоль Калінін, пралічвалася, што фінансаванне інфраструктуры Зялёнага Бора будзе ісці з усіх крыніц: як рэспубліканскага і мясцовага бюджэтаў, так і за кошт сродкаў прыватных кампаній, якія жадаюць забудоўваць гэтую тэрыторыю. Паводле яго словаў, прапрацоўваецца магчымасць комплекснага асваення цэлага рэгіёну: Зялёны Бор размешчаны паблізу пасёлка Сокал, той у сваю чаргу мяжуе з Беларуска-кітайскім індустрыяльным паркам, затым ідуць Смалявічы. Анатоль Калінін дадаў, што гэта пытанне патрабуе дадатковага вывучэння.

На нарадзе выступілі і інвестары, што першапачаткова планавалі забудоўваць тэрыторыю Зялёнага Бора.
Паводле іх словаў, з моманту распрацоўкі праекта змянілася эканамічная сітуацыя, у планы ўнёс карэктывы і фінансава-эканамічны крызіс. У той жа час прыватныя кампаніі не адмаўляюцца ад рэалізацыі праекта, а жадаюць скараціць яго аб’ёмы і падоўжыць тэрміны.

Так, у прыватнасці, прапануецца забудаваць тэрыторыю на 260 га, дзе размесціцца 1,2 млн кв.м жылля.

«Юнівест-М» гатовы ўзвесці 500 тысяч квадратных метраў жылля. Астатнія 700 тысяч возьме на сябе Мінгарвыканкам. Такую раскладку агучыў на нарадзе кіраўнік «Юнівест-М» Анатоль Тарнаўскі,
гаворыцца ў сюжэце тэлеканала СТВ. Мінгарвыканкам таксама прафінансуе інфраструктурныя работы на суму 25 млн даляраў. Абмяркоўвалася прапанова вызваліць «Юнівест-М» ад абавязанняў узвесці школу і дзіцячы садок і падоўжыць тэрміны забудовы да 2020 года. Лукашэнка пагадзіўся па тэрмінах, але што да школы і дзіцячага садка — «тут трэба нам падумаць», «Я не гатовы сёння сказаць», «Добра, здымем гэта і гэтак далей», — сказаў кіраўнік дзяржавы. Тут варта адзначыць, што раней «Юнівест-М» анансаваў ў Калодзішчах забудову жылога комплексу пад назвай Нотынгем. На 290,3 га меркавалася пабудаваць больш за 850 тыс. кв.м жылля для 21 тысячы чалавек.
Аўтарам праекта пад назвай Зялёны Бор (не блытаць з тым, што вырас у Бараўлянах) была кампанія «Трайпл». Але яна вырашыла пакуль выйсці з праекта па забудове ў пасёлку Калодзішчы.
«Трайпл» збіраецца працаваць па іншых праектах у супрацоўніцтве з Міністэрствам абароны. На нарадзе дамовіліся, што «Трайпл» пабудуе каля 100 тыс. кв.м жылля для вайскоўцаў, гэта значыць у 2 разы менш, чым меркавалася раней. У якасці кампенсацыі за гэта Юры Чыж атрымае права забудаваць вызваленыя вайскоўцамі зямельныя ўчасткі, размешчаныя ў Мінску і Мінскім раёне.