Кірмаш стартапаў на Мінскім інвестфоруме: топ-15 бізнэс-ідэй
Патэнцыйныя мільянеры прадставілі інвестарам свае праекты: лекі для сабак, праграмы для сматфонаў і рыбныя снэкі.
Дзень стартапаў – адно з мерапрыемстваў Беларускага інвестыцыйнага форуму.
Падчас яго 15 маладых беларускіх бізнэсоўцаў прадставілі аўдыторыі свае праекты і паспрабавалі знайсці інвестараў.Дзяржава, у сваю чаргу, паабяцала канкурсантам гранты памерам $30 тысяч.
Cтартап – гэта нядаўна створаная кампанія, якая будуе свой бізнес на аснове інавацыйных тэхналогій, мае недахоп рэсурсаў і шукае інвестара, якому зазвычай гатовая прапанаваць 25-50% сваіх акцый.
Такім чынам, 15 перспектыўных ідэй беларускіх вынаходнікаў.
1. iMeterege – вымяральнік адлегласцяў з дапамогай мабільніка
Павел Шылёнак і Віталь Нікуленка ўжо стварылі модуль, які дазволіць вымяраць адлегласць да аб’екта праз смартфон.
Для гэтага да тэлефона трэба падлучыць ультрагукавы далямер з лазернай падсветкай. Пасля аб’ект фатаграфуецца, і на яго выяве з’яўляюцца вынікі вымярэнняў.
Каму спатрэбіцца праграма? Стваральнікі разлічваюць, што яе будуць выкарыстоўваць рыэлтары і будаўнікі. Дакладнасць вымярэння складзе 5-6 міліметраў.
2. Малахія – аптэка з дэфіцытнымі лекамі
Два пакаленні (бацька і сын) Уладзіміраў Малахавых прапануюць стварыць навукова-вытворчую аптэку "Малахія”, якая будзе спецыялізавацца на дробнасерыйным выпуску дарагіх і дэфіцытных прэпаратаў, у прыватнасці, лекаў ад рака.
Прадпрыемства будзе адпавядаць стандарту GMP, які дазволіць экспартаваць гэтую паслугу замежным фармацэўтычным вытворцам.Патрэбныя інвестыцыі – $4,6 мільёна.
3. SpryBoard - экраны з рэкламай у крамах
Ідэя Паўла Мазуркевіча заключаецца ў стварэнні рэкламна-інфармацыйных электронных цэннікаў.
Ён прапануе размяшчаць рэкламную інфармацыю на экранах у гіпермаркеце. Зарабляць мяркуецца на кантэкставай рэкламе вытворцаў.
$40 тысяч у праект ужо ўкладзена. Экраны стаяць у крамах “Ома” і “Юбілейны-92”. Але патрэбна яшчэ $240 тысяч.
4. Say-n-ride – пошук спадарожніка на дарозе
З дапамогай гэтай праграмы аўтамабілісты змогуць знайсці спадарожнікаў.
Патэнцыйны пасажыр пакідае на спецыяльным серверы платную галасавую аб’яву, дзе яе можа праслухаць кіроўца. Калі ім ехаць у адным кірунку, чаму б не рушыць разам і не падзяліць выдаткі на паліва?
Працаваць у Беларусі стваральнікі пакуль не збіраюцца. А вось для таго, каб пачаць працу на рынку Чыкага, Аляксею Іванчыкаву і Ягору Вецеру патрэбна $3 мільёны. Праз пару гадоў яны разлічваюць зарабіць $180 мільёнаў.
5. Maesens – інтэрактыўная дабрачыннасць
Сайт Маесэнс ужо паспяхова працуе ў інтэрнэце і мае больш 35 тысяч карыстальнікаў. Цяпер аўтарка ідэі Алеся Абраменка хоча раскруціцца на амерыканскім рынку пад назвай Goodwillion. Нагадаем, што
кожны ахвотны можа выставіць на аўкцыён сустрэчу з сабой. 80% атрыманых грошай ідуць на дабрачыннасць, а рэшта – на падтрыманне праекта.Інвестыцыі – а гэта парадку $300 тысяч – патрэбныя на маштабную рэкламу ў ЗША і Расіі.
6. SellerHit – вылічальнік аптымальнай цаны
Прадпрымальнікам, якія прадаюць тавары і паслугі на гандлёвых пляцоўках у інтэрнэце, перадусім на сервісе Amazon, Раман Бугаёў прапануе сваю дапамогу.
Ягоны сэрвіс аўтаматычна вылічыць аптымальную цану ў залежнасці ад дзеянняў канкурэнтаў.У наступным месяцы сэрвіс запрацуе ў Германіі. Заснавальнікам патрэбныя не грошы, а партнёры ў ЗША і Кітаі.
7. Мая рыбка – снэкі з айчыннай рыбы
Беларускім спажыўцам не хапае снэкаў з айчыннай рыбы,перакананыя Эдуард Бондар і Уладзімір Масейкоў. На рынку хапае прапановы ад замежных вытворцаў, а вось беларуская рыба не выкарыстоўваецца. Каб запусціць вытворчасць закускі да піва, ім патрэбна $1,5 мільёна інвестыцый. У перспектыве запланаваныя выхад на расійскі і ўкраінскі рынкі.
8. Фермерская гаспадарка – гадоўля в’етнамскіх свінняў
Дзмітрый Радзюк прапануе пабудаваць ферму для гадоўлі в’етнамскіх свінняў магутнасцю 1400 галоваў.Іх перавага — у далікатэсным мясе з паніжаным утрыманнем халестарыну. Для арганізацыі вытворчасці Дзмітрый Радзюк плануе атрымаць $210 тысяч. Прадаючы сваю экалагічна чыстую прадукцыю, ён мяркуе акупіць іх за 3,5 года.
9. Прэпарат для лячэння раку
Навуковец Дзмітрый Рудакоў перакананы, што ягоная
ідэя выпуску прэпарату для бор-нейтроназахопнай тэрапіі раку ўратуе тысячы хворых.Пакуль што атрымае рэчыва праходзіць выпрабаванні на жывёлах.
10. Ветэрынарныя прэпараты для сабак
Фармацэўтыкай займаецца і Уладзімір Пракулевіч.
Ён прапануе прэпарат “ФаніФерон” для прафілактыкі і лекавання разнастайных захворванняў у сабак – атытаў, дэрматытаў, пнеўманіі…У аснове прэпарату — спецыяльны аналаг інтэрферону. У перспектыве можна распрацоўваць і лекі для катоў. Для старту праекта патрэбна $3 мільёны інвестыцый.
Што яшчэ?
11. Флама (аўтар праекта – Дзмітрый Губар). Вытворчасць газагенератарнага абсталявання. Патрэбна $720 тысяч.
12. ТурбаСфера (Кірыла Ляўкоў). Перапрацоўка цеплавых адкідаў у энергію ў мікратурбіне. Патрэбна $3 мільёны.
13. Перапрацоўка шын (Аляксандр Палееў). Будаўніцтва завода па перапрацоўцы аўтамабільных шын у тэрмаэластапласты. Патрэбна каля $1,6 мільёна.
14. Клеткавыя тэхналогіі (Ганна Буценка). Вытворчасць клеткавых прадуктаў для лячэння дэфектаў скуры. Патрэбна каля $600 тысяч.
15. Плазмамет (Сяргей Багаеў). Стварэнне вытворча-кансалтынгавай кампаніі ў галіне фізіка-хімічных метадаў апрацоўкі металу. Патрэбна каля $205 тысяч.
Прапагандыстка АНТ Наталля Стэльмах змяніла імя на Наці Рышна і зарабляе ў Мексіцы на шаманах і наркатычных грыбах50
Каментары