Расійскіх артыстаў Манетачку і Noize MC намінавалі на Нобелеўскую прэмію міру
Іх кандыдатуры падтрымалі супрацоўнікі Сталічнага ўніверсітэта ў нарвежскім Осла.
Расійскіх выканаўцаў Лізавету Гырдымаву, вядомую як Манетачка, і Івана Аляксеева, які выступае пад псеўданімам Noize MC, намінавалі на Нобелеўскую прэмію міру 2025 года.
Артыстаў на прэмію вылучылі супрацоўнікі Сталічнага ўніверсітэта ў Осла. Прафесар Арнфін Мурувік Вонен распавёў журналісту Уладзіміру Раеўскаму, што Манетачка і Noize MC «прадстаўляюць сваімі галасамі новае пакаленне, якое вельмі моцна выказваецца за гуманістычныя каштоўнасці».
Намінацыю пацвердзіла і менеджарка Івана Аляксеева, піша «Агенцтва».
І Манетачка, і Noize MC асудзілі поўнамаштабнае ўварванне і з'ехалі з Расіі. На сваіх канцэртах яны ў тым ліку збіралі грошы для дапамогі Украіне.
У Расіі абодва выканаўцы прызнаныя замежнымі агентамі, на іх заведзеныя крымінальныя справы.
Заяўкі на Нобелеўскую прэмію міру могуць падаваць прафесары ўніверсітэтаў, ганаровыя прафесары і дацэнты гісторыі, сацыяльных навук, права, філасофіі, тэалогіі і рэлігіі. Прэмію ўручаюць за важкі ўклад у згуртаванне народаў, ліквідацыю або скарачэнне колькасці пастаянных армій або ў развіццё мірных ініцыятыў.
У 2022 годзе Нобелеўскую прэмію міру атрымаў беларускі праваабаронца і палітвязень Алесь Бяляцкі.
Выйшаў на свабоду 76-гадовы Сямён Добкін, брат заснавальніка EPAM7
Каментары