У Мінску дзевяцігадовая дзяўчынка аддала ашуканцам бацькоўскія зберажэнні — больш за 5 тысяч даляраў
Невядомыя пазванілі ў месенджары.
Дзевяцігадовая дзяўчынка ў Мінску аддала ашуканцам бацькоўскія зберажэнні. Ёй у месенджары патэлефанаваў невядомы і патлумачыў, што на яе тэлефоне ўтварылася запазычанасць. Каб бацькі нічога не даведаліся, дзяўчынцы прапанавалі пашукаць у кватэры грошы і перадаць даросламу, які дапаможа ўнесці іх на рахунак.
Дзяўчынка прызналася, што не ведае, дзе бацькі захоўваюць грошы. Тады махляры параілі пашукаць у шафе сярод бялізны.
Сапраўды, там дзіця знайшло больш за пяць тысяч даляраў, а таксама еўра і беларускія рублі.
Школьніца схавала грошы ад бацькоў, а на наступны дзень па сігнале махляроў перадала іх жанчыне на дзіцячай пляцоўцы, распавялі ў МУС.
Кур'ерам аказалася 39-гадовая салігарчанка, якая таксама стала ахвярай махляроў. Яе пераканалі ў наяўнасці вялікага доўгу, даручылі ўзяць крэдыт, а потым яшчэ і забраць грошы ў дзяўчынкі ў Мінску. Жанчыну затрымалі, але яна паспела перавесці грошы куратару.
Следчыя распачалі крымінальную справу за махлярства ў буйным памеры.
«Я сам усё рабіў правільна». Сын дыякана папрасіў пазбавіць візы дачку генерала — і трапіў у турму за палітыку2
Каментары