Расійскую шпіёнку, якая збіралася спакусіць і выкрасці журналіста Грозева, пры арышце заспелі ў ложку з іншым агентам Крамля

У Лондане праходзіць маштабны працэс па справе аб шпіянажы, у рамках якога перад судом паўстае група агентаў, якія, як сцвярджае следства, працавалі на карысць расійскай разведкі па ўсёй Еўропе.

Двое з пяці абвінавачаных ужо прызналі сваю віну. Падчас судовага разгляду сталі вядомыя новыя пікантныя падрабязнасці: два балгары — Ваня Габерава і Бізер Джамбазаў — падчас затрымання ў 2023 годзе былі разам абсалютна голымі ў адным ложку, што паказвае на іх блізкія адносіны, перадае выданне Bild.

Паводле брытанскай пракуратуры, Габерава павінна была спакусіць вядомага журналіста-расследавальніка Хрыста Грозева, каб здабыць на яго кампрамат і вывезці ў Расію. Шпіёнская сетка перад гэтым сачыла за Грозевым у Аўстрыі, Чарнагорыі і Іспаніі.

Грозеў даўно з'яўляецца праблемай для Крамля — ён неаднаразова раскрываў расійскія спецаперацыі, у тым ліку звязаныя са збіццём малазійскага пасажырскага рэйсу MH17 у небе над украінскім Данбасам у 2014 годзе і дзейнасцю расійскага агента Вадзіма Красікава ў Берліне. Журналіст таксама займаўся справай аб атручэнні Аляксея Навальнага.

Некаторыя члены шпіёнскай сеткі ў перапісцы паміж сабой называлі Ваню Габераву «сапраўды сэксуальнай жанчынай» і «свінгеркай». У іх перапісцы таксама абмяркоўваліся забойствы і выкраданні, паведамляе брытанскае следства.

У той жа час былыя суседзі Бізера Джамбазава распавялі паліцыі, што той перад затрыманнем пражываў з Катрын Іванавай — яшчэ адной падазраванай у справе аб шпіянажы — і што яны былі парай. Джамбазаў і Іванава ўзначальвалі ў Вялікабрытаніі грамадскую арганізацыю, якая павінна была знаёміць балгарскіх мігрантаў і турыстаў з «культурай і нормамі брытанскага грамадства».

Павялічыць

Акрамя сачэння за журналістамі, выкрытая крамлёўская шпіёнская сетка збірала інфармацыю аб важных для Масквы аб'ектах, уключаючы амерыканскую вайсковую базу «Патч-Казармы» ў Штутгарце. Іншымі цэлямі шпіёнскай сеткі былі былы супрацоўнік Следчага камітэта Расіі Кірыл Качур, якога ў Расіі прызналі «замежным агентам», і казахскі палітык Бергей Рыскаліеў, які ўцёк з Казахстана і атрымаў у Вялікабрытаніі палітычны прытулак. Акрамя таго, абвінавачаныя планавалі правесці дэманстрацыю ля амбасады Казахстана ў Лондане, каб потым перадаць звесткі пра яе «арганізатара» Казахстану і палепшыць стасункі краіны з Расіяй.

Ян Марсалек, аўстрыйскі мільянер, якога следства ўважае за кіраўніка шпіёнскай сеткі, займаў пасаду аперацыйнага дырэктара фінансавага стартапа Wirecard, які збанкрутаваў у 2020 годзе, калі аўдытары выявілі, што з ягоных рахункаў зніклі амаль 2 мільярды еўра.

Улады Германіі і Аўстрыі лічаць Марсалека ключавой фігурай у крадзяжы грошай, ён знаходзіцца ў міжнародным вышуку. Пасля крушэння Wirecard Марсалек у чэрвені 2020-га года паляцеў у Беларусь, адкуль дабраўся да Расіі. Паводле звестак журналістаў, ён атрымаў расійскі пашпарт на імя Германа Бажэнава.

• 3
• 0
• 18
• 3
• 0
• 1
• 2
• 0