ШІ-порна пачынае выцясняць звычайнае. «Онліфанз» ператвараецца ў платформу дыпфэйкаў

«Лічбавая эпоха пастаянна развіваецца, і разам з ёй больш шырокімі і разнастайнымі становяцца магчымасці для стварэння кантэнту», — гаворыцца на сайце, які рэкламуе новую мадэль бізнэсу — OFM IA — OnlyFans менеджмент з выкарыстаннем штучнага інтэлекту.

Калі пры традыцыйным вядзенні OnlyFans-акаўнта менеджар выступаў пасрэднікам паміж мадэллю — стваральніцай кантэнту і аўдыторыяй, дапамагаючы ёй кіраваць уліковым запісам і забяспечваць эфектыўную прысутнасць у інтэрнэце, то новая тэхналогія мяняе падыход.

Распрацоўшчыкі новай платформы заяўляюць, што дзякуючы выкарыстанню віртуальных мадэляў і магутных аўтаматызаваных інструментаў OFM IA спрашчае працэс стварэння і распаўсюджання кантэнту. Цяпер не трэба шукаць мадэляў, дастаткова стварыць іх з дапамогай штучнага інтэлекту. Гэта спрашчае працэс і робіць яго больш прыбытковым.

У выніку шмат хто з маладых прадпрымальнікаў пераключаецца на гэты менш працазатратны спосаб заробку. Але побач з высокай манетызацыяй гэты тып бізнэсу парушае этычныя і юрыдычныя нормы. На гэта звяртаюць увагу аўтары артыкула ў Le Monde.

Прадпрымальнікі, якія часта працуюць з Дубая (які вядомы нізкім падаткаабкладаннем і ліберальным заканадаўствам), актыўна прапагандуюць новы бізнэс на аснове тэхналогій OFM IA, публікуюць інструкцыі, якія вучаць таму, як ствараць мадэлі з выкарыстаннем штучнага інтэлекту. Асобныя з такіх відэа набіраюць сотні тысяч праглядаў на YouTube.

Апроч бясплатных інструкцый, аўтары прапануюць платныя курсы, якія фактычна з'яўляюцца іх асноўнай крыніцай даходу. Гэтыя курсы абяцаюць навучыць усіх ахвотных тонкасцям стварэння і кіравання такімі віртуальнымі мадэлямі, ператвараючы продажы навучання ў ключавы элемент іх бізнэсу.

Павялічыць

Прадпрымальнікі, якія займаюцца бізнэсам на аснове OFM IA, не толькі ўвесь час хваляць поспехі сваіх фальшывых профіляў і фінансавыя дасягненні, каб прыцягнуць новых людзей у свае фінансавыя піраміды, але і заахвочваюць крадзеж кантэнту рэальных асоб. Жанчыны, чые выявы выкарыстоўваюцца, звычайна не ведаюць пра тое, што адбываецца, і не даюць згоду на выкарыстанне іх кантэнту.

Ахвярамі становяцца тры катэгорыі жанчын. У першую чаргу гэта стваральніцы эратычнага або сэксуальнага кантэнту, чые фатаграфіі ці відэа трапілі ў інтэрнэт. Гэтыя матэрыялы, прапушчаныя праз жорны штучнага інтэлекту, перапрадаюцца.

Другая катэгорыя — lifestyle-блогеры-інфлюенсеры, якія дзеляцца кантэнтам, звязаным з рознымі аспектамі свайго штодзённага жыцця, і маюць значную аўдыторыю прыхільнікаў. У іх стваральнікі фэйкавых вобразаў звычайна крадуць здымкі ў купальніках.

Трэцяя катэгорыя ахвяр — звычайныя маладыя жанчыны, якія нікому невядомыя. Іх паўсядзённыя выявы таксама пераўтвараюцца для стварэння прывабнага кантэнту фэйкавых акаўнтаў для прыцягнення кліентаў.

Журналісты Le Monde пагаварылі з прадпрымальнікам, якія працуе з OFM IA. Ён прызнаўся, што для стварэння аднаго фальшывага профілю на розных платформах выкарыстоўвае фота і відэа некалькіх жанчын. Напрыклад, для пастоў і відэа ў Instagram мужчына пераўтварае выявы звычайных жанчын, а для кантэнту, які манетызуецца, мадэляў OnlyFans.

Сёння сотні фальшывых акаўнтаў у Instagram, TikTok і X публікуюць фэйкавыя фота і відэа дзяўчат у прынадлівых позах і накіроўваюць карыстальнікаў на платныя платформы, дзе ім прапануюць набыць «прыватны» кантэнт, створаны на аснове скрадзеных выяў, якія з дапамогай штучнага інтэлекту змененыя і перапрацаваныя без згоды тых асоб, чые фота і відэа былі выкарыстаныя ў якасці асновы.

Павялічыць

Журналісты амерыканскіх выданняў 404 Media і Wired правялі ўласнае расследаванне і сцвярджаюць, што налічылі звыш тысячы акаўнтаў толькі ў Instagram, кантэнт якіх створаны з дапамогай штучнага інтэлекту. Яго аўтары дзеляцца ў суполках на Discord парадамі, стратэгіямі і інфармацыяй пра тое, як эфектыўна зарабіць грошы з дапамогай «ШІ-прастытуцыі». Некаторыя з дадаткаў свабодна распаўсюджваюцца ў магазінах Apple App і Google Play.

Расследаванне паказвае, што тое, што раней было нішавай праблемай, цяпер стала масавай з'явай, і гэта дэманструе, што сацыяльныя сеткі ў найбліжэйшай будучыні могуць стаць прасторай, дзе штучны інтэлект засланяе чалавечы.

Ужо сёння, як прызналася журналістам адна з мадэляў OnlyFans — Elaina St James, яны сутыкаюцца з канкурэнцыяй з боку фэйкавых акаўнтаў, створаных з дапамогай штучнага інтэлекту. Так, за дзесяць месяцаў гэтага года, па словах мадэлі, колькасць праглядаў у месяц у яе ўпала да 500 тысяч, да гэтага дзяўчына звычайна набірала ад 1 да 5 мільёнаў.

Дзейнасць па стварэнні фэйкавых акаўнтаў шмат у чым незаконная, бо парушаюцца правы на выяву і асабістыя правы людзей, фота і відэа якіх выкарыстоўваюць без іх згоды. У той жа час уладальнікі такіх платформаў, як Instagram, не могуць ці не хочуць спыніць паток фэйкавага кантэнту, створанага з дапамогай штучнага інтэлекту.

• 5
• 1
• 21
• 4
• 6
• 2
• 4
• 1