Пасля акцыі ў «Макдональдсе» Трамп сеў на смеццявоз — каб дапячы Байдэну
Былы прэзідэнт Дональд Трамп быў сустрэты ў аэрапорце ў Вісконсіне ў сераду на вялікім белым смеццявозе.
«Як вам мой смеццявоз?» — спытаў Трамп, апрануты ў аранжавую ахоўную камізэльку, у журналістаў, сядзячы на пасажырскім сядзенні аўтамабіля, які кружыў па тэрыторыі аэрапорта, піша New York Post.
Гэтая акцыя адбылася на наступны дзень пасля таго, як 81-гадовы прэзідэнт Байдэн трапіў у непрыемную сітуацыю: асуджаючы выказванні коміка Тоні Хінчкліфа, які назваў Пуэрта-Рыка «плаваючым востравам смецця», Байдэн пакрыўдзіў прыхільнікаў Трампа — тыя лічаць, што ён назваў «смеццем» іх.
«Адзінае смецце, якое я бачу, гэта яго прыхільнікі. Яго дэманізацыя лацінаамерыканцаў — гэта недапушчальна і супярэчыць амерыканскім каштоўнасцям», — сказаў Байдэн падчас размовы з групай Voto Latino, у той час як віцэ-прэзідэнт Камала Харыс выступала побач на Эліпсе ў Вашынгтоне, падкрэсліваючы, як Дэмакратычная партыя аб'яднае краіну.
Рэспубліканцы адразу асудзілі гэтую абразу і параўналі яе з выказваннем тагачаснага кандыдата ў прэзідэнты ад Дэмакратычнай партыі Хілары Клінтан у 2016 годзе, калі яна заявіла, што палова прыхільнікаў Трампа павінна быць «пакладзена ў кошык нягоднікаў».
Трамп дыстанцыяваўся ад Хінчкліфа. Калі яго спыталі, ці павінен ён папрасіць прабачэння перад Пуэрта-Рыка, Трамп, седзячы ў смеццявозе, заявіў, што «нічога не ведае пра коміка», а затым прызнаўся ў сваёй любові да Карыбскай выспы.
«Ніхто не зрабіў для Пуэрта-Рыка больш, чым я. Я клапаціўся пра іх, калі на іх абрынуліся моцныя ўраганы. Ніхто не ладзіць з Пуэрта-Рыка і пуэртарыканцамі лепш, чым я. Яны любяць мяне, а я люблю іх», — сказаў ён.
Каментары