Беларускія арганізацыі сталі страшыць фэйкавымі праверкамі ад Мінюста
У дзяржаўныя структуры і прыватныя кампаніі Беларусі пачалі паступаць «распараджэнні аб пазапланавых праверках» ад імя Міністэрства юстыцыі. Само міністэрства ад іх адхрысцілася.
Паводле інфармацыі, выдадзенай ведамствам 27 верасня, некаторыя дзяржаўныя і камерцыйныя арганізацыі атрымалі «распараджэнні аб правядзенні пазапланавай дакументарнай праверкі юрыдычнай асобы». Аднак Міністэрства юстыцыі заявіла, што гэтыя дакументы — фальшыўка.
У афіцыйным каментары Мінюста падкрэслена, што такія дакументы «з'яўляюцца фэйкамі і не маюць ніякага дачынення да Міністэрства юстыцыі Рэспублікі Беларусь».
Фальшывыя распараджэнні рассылаліся праз электронныя сродкі сувязі, у тым ліку праз месенджар Telegram. Ад імя аднаго з намеснікаў міністра юстыцыі, з падробленага акаўнта нават вялася перапіска з прадстаўнікамі арганізацый з просьбамі аб садзейнічанні правяраючым асобам.
Міністэрства адзначыла, што фэйкавыя дакументы былі створаныя на «бланках неўстаноўленага ўзору», а іх пячаткі і подпісы не адпавядаюць сапраўдным.
Каментары