Жыхар Баранавічаў паспрабаваў забіць знаёмага, каб не вяртаць вялікі доўг
А той пасля ўдару нажом прытварыўся мёртвым, а потым выскачыў з багажніка.
Гісторыя адбылася ў пачатку верасня. У свайго знаёмага 36-гадовы жыхар Баранавічаў пазычыў 1,5 млн расійскіх рублёў (16 тысяч даляраў). Грошы вяртаць не меў намеру, а палічыў, што лепш пазбавіцца ад пазычальніка, паведаміў СК.
«Уначы 13 верасня фігурант папрасіў 49-гадовага мужчыну прыехаць і дапамагчы адбуксіраваць аўтамабіль, а заадно паабяцаў вярнуць грошы. Падчас сустрэчы на абочыне трасы недалёка ад Баранавічаў падазраваны прапанаваў прысесці ў машыну, дзе нібыта ляжала торба з грашыма. Калі знаёмы сеў у аўтамабіль, фігурант ударыў яго нажом у шыю. Пацярпелы спрабаваў абараняцца і ўступіў у барацьбу, аднак пасля атрымання яшчэ аднаго нажавога ранення страціў сілы і ўпаў на зямлю, прыкінуўшыся мёртвым», — раскрыў дэталі СК.
Фігурант паверыў, што са знаёмым скончана. Ён загрузіў яго ў багажнік машыны і паехаў у бок горада. У дарозе пацярпелы змог знутры адкрыць крышку багажніка і на хаду выбрацца з аўтамабіля.
Сцякаючы крывёй, мужчына дайшоў да бліжэйшай запраўкі, работнікі якой выклікалі яму хуткую дапамогу, а таксама патэлефанавалі ў міліцыю. Пацярпелага даставілі ў бальніцу, яго жыццю нічога не пагражае.
Зламыснік жа прыехаў дадому і толькі там выявіў адсутнасць знаёмага. Неўзабаве падазраванага затрымалі.
«Падчас агляду аўтамабіля і гаража падазраванага выяўленыя нож, цырата і рыдлёўка. Таксама ўстаноўлена, што фігурант не аднойчы атрымліваў грошы ў доўг ад сваіх знаёмых і не меў намеру вяртаць грошы», — заўважыў афіцыйны прадстаўнік УСК па Брэсцкай вобласці.
У дачыненні да мужчыны распачалі крымінальную справу па некалькіх артыкулах. У следчых ёсць падставы меркаваць, што фактаў супрацьпраўнай дзейнасці мужчыны можа быць больш.
«Сяргей» не адзін. Вось як КДБ прапануе зарабіць на сачэнні за беларускімі эмігрантамі2
Каментары
Калі пытаюцца ў Бабруйску Займі грошы Бабруйчанін адказвае У кого?.