Стала вядома, колькі жыхароў Беларусі звярнуліся да страхоўшчыкаў пасля разбуральнага ліпеньскага ўрагану
Ад непагадзі пацярпела маёмасць як фізічных, так і юрыдычных асоб. Самыя частыя звароты тычыліся пашкоджанняў дамоў.
Больш за 14 тысяч заяў на кампенсацыю шкоды прынялі беларускія страхавальнікі пасля ліпеньскага ўрагану «Ігар».
Ураган бушаваў на тэрыторыі Беларусі 13-18 ліпеня, вецер з парывамі да 100 метраў за секунду паваліў сотні дрэў, пашкодзіў дамы і машыны, сотні населеных пунктаў тады засталіся без святла і вады. З-за непагадзі загінулі шэсць чалавек.
Самыя частыя звароты да страхоўшчыкаў тычыліся выпадкаў пашкоджання дахаў, падстрэшкаў, сцен, вокнаў, элементаў аздаблення будынкаў і жылых дамоў, піша «Страхаванне ў Беларусі».
Таксама істотную частку зваротаў за страхавой выплатай складалі выпадкі пашкоджання кузава і шклення транспартных сродкаў градам, паваленымі дрэвамі, галінкамі, староннімі прадметамі ў выніку шквалістага ветру, а таксама затапленняў.
Агульная сума страхавых выплат не называецца.
Каментары