Суд завочна прыгаварыў гарадзенскага журналіста Алеся Кіркевіча да 7 гадоў, вялікага штрафу і канфіскацыі нерухомасці
Прычым «аднакватэрны жылы дом», пра які ідзе гаворка ў прысудзе, гэта школа, у якой вучыўся Васіль Быкаў, у Бычках.
Крымінальную справу, распачатую супраць журналіста Алеся Кіркевіча ў парадку спецвытворчасці, разглядаў суддзя Гродзенскага абласнога суда Юрый Казакевіч, паведамляе БАЖ.
Алеся Кіркевіча суд прызнаў вінаватым у садзейнічанні экстрэмісцкай дзейнасці і на падставе ч. 1 арт. 361—4 і пакараў па гэтым артыкуле тры гадамі.
Таксама Кіркевіч прызнаны вінаватым у іншым садзейнічанні экстрэмісцкай дзейнасці, учыненым паўторна, групай асоб па папярэдняй змове, і на падставе ч. 2 арт. 361—4 КК пакараны за гэта пазбаўленнем волі на тэрмін 5 гадоў са штрафам 600 базавых велічынь (24 тысячы рублёў).
«Па сукупнасці злачынстваў шляхам частковага складання асноўных пакаранняў і поўнага далучэння дадатковага пакарання» канчаткова суд пастанавіў прызначыць Алесю Кіркевічу пакаранне ў выглядзе пазбаўлення волі на тэрмін 7 гадоў з адбываннем у папраўчай калоніі ва ўмовах узмоцненага рэжыму. А таксама прызначыў штраф 24 000 рублёў.
Суд пастанавіў, што рэчавыя доказы па справе журналіста будуць захоўвацца ў матэрыялах крымінальнай справы.
Рэчавымі доказамі, паводле якіх Алеся Кіркевіча прызналі вінаватым, сталі:
— CD‑R дыск з запісанымі на ім аўдыёфайламі;
— раздрукаваны артыкул «Алесь Кіркевіч: «У сённяшняй Беларусі надышоў максімальна неспрыяльны час для стварэння беларускага кантэнту», які выйшаў на сайце «Радыё Свабода» 25 верасня 2022 года;
— CD‑R дыск з запісаным на ім відэаролікам з «Бондарева-юродивая. Аўтар праекта «Трызуб і Пагоня» аб сітуацыі з беларускай мовай/ Мова нанова»;
— раздрукаваны артыкул «Ідзем у бок Паўночнай Карэі: хваліць рэжым і шукаць шпіёнаў. Беларускія гіды — аб новых патрабаваннях», які выйшаў на сайце belsat.eu 2 жніўня 2023 года.
Паводле пераліку гэтых рэчавых доказаў, можна меркаваць, што крымінальную справу супраць Алеся Кіркевіча распачалі за супрацоўніцтва з незалежнымі медыямі, абвешчанымі ў Беларусі экстрэмісцкімі фармаваннямі.
У кошт аплаты штрафу суд пастанавіў прадаць маёмасць Алеся Кіркевіча
У выраку, які вынес Гродзенскі абласны суд, асобна агавораны лёс арыштаванай маёмасці журналіста. Гэта «1/3 долі права ўласнасці Кіркевіча А. Р. на будынак аднакватэрнага жылога дома па адрасе: Віцебская вобласць, Ушацкі раён, Кубліцкі сельскі савет, в. Бычкі, вул. Цэнтральная, д. 33». Арышт на маёмасць быў накладзены 22 лістапада 2023 года, і яе вырашана рэалізаваць у кошт пагашэння штрафу.
«Аднакватэрны жылы дом», пра які вядзецца ў прысудзе, знаходзіцца ў вёсцы Бычкі — малой радзіме знакамітага Васіля Быкава. Некалі грамадскія актывісты набылі будынак колішняй вясковай школы, дзе ў першым класе вучыўся будучы пісьменнік.
Калі школу ў Бычках закрылі, у драўляную хату засяліліся людзі, і за некалькі дзесяцігоддзяў яна змяніла некалькі гаспадароў. Апошнімі тутэйшымі насельнікам была сям’я Антаніны Быкавай, швагеркі Васіля Быкава.
Потым у выкупленай хаце праводзілі летнікі для грамадска актыўнай моладзі.
***
Журналіст-фрылансер, пісьменнік і краязнаўца, колішні намеснік старшыні «Маладога фронту» Алесь Кіркевіч — былы палітвязень. Ён браў удзел у пратэстах супраць фальсіфікацыі вынікаў прэзідэнцкіх выбараў 19 снежня 2010 года. На пачатку 2011-га быў арыштаваны. 5 мая 2011 года суд Кастрычніцкага раёна Мінска прыгаварыў яго да 4 гадоў зняволення ў калоніі ўзмоцненага рэжыму. Адбываў пакаранне ў наваполацкай папраўчай калоніі, быў вызвалены праз памілаванне 1 верасня 2011 года.
Каментары