У Кіеве заявілі пра стварэнне беларускага грамадскага руху «Каліноўцы». У кіраўніцтве вядомыя асобы

У якасці галоўнай місіі новага руху падаецца «супрацьстаянне расійскай агрэсіі і вызваленне Беларусі ад калабарацыянісцкага рэжыму Лукашэнкі».

Тактычнай мэтай названа ўзмацненне тэхнічнага і мабілізацыйнага забеспячэння ПКК за кошт магчымасцяў беларусаў. Як тых, хто застаецца сёння ў краіне, так і тых, хто вымушаны быў пакінуць радзіму.

Рашэнне аб стварэнні руху, паводле Вадзіма Кабанчука, было прынята на апошніх палкавых зборах. Ён акрэсліў полк Каліноўскага як «вайскова-грамадскі праект, які ўключае ў сябе дзейных вайскоўцаў, тых, хто ўжо прайшоў службу і цяпер знаходзіцца ў актыўным рэзерве ў Еўропе і ва Украіне, а таксама тых, хто садзейнічае і дапамагае ўдзелу падраздзялення ў эфектыўным вядзенні баявых дзеянняў».

Заснавальнікі руху бачаць неабходнасць «кансалідацыі ўсіх беларускіх нацыянальна-вызваленчых сіл вакол беларускіх добраахвотнікаў, ПКК і руху «Каліноўцы».

Сярод бягучых задач новага руху Дзяніс Прохараў адзначыў рэалізацыю праектаў па тэхнічным забеспячэнні ПКК сучаснымі відамі ўзбраенняў, прывёўшы ў прыклад праект «Беларускі дрон». Таксама ён мусіць рупіцца пра стварэнне ўмоў і каардынацыю падрыхтоўкі беларусаў, якія могуць стаць патэнцыйным мабілізацыйным рэсурсам ПКК, арганізацыю рэабілітацыі і падтрымкі ветэранаў палка ў краінах Еўропы.

Акрамя таго, у прыярытэтах «Каліноўцаў» — каардынацыя працы з беларускімі дэмакратычнымі сіламі: Каардынацыйнай радай, Аб'яднаным пераходным кабінетам і Офісам Святланы Ціханоўскай.

Падчас брыфінгу Прохараў заклікаў дэмакратычныя сілы вярнуцца да стварэння каардынацыйнага органа беларускага нацыянальна-вызвольнага руху ў рамках рэалізацыі рашэнняў канферэнцыі «Шлях да волі», якая адбылася ў Кіеве ў лістападзе 2023 года.

Дзмітрый Шчыгельскі падкрэсліў, што «Каліноўцы», маўляў, нацэленыя не на канфрантацыю, а на «прадуктыўнае супрацоўніцтва з усімі інстытуцыянальнымі структурамі»

Вадзім Кабанчук адхіліў версію пра тое, што стварэнне руху «Каліноўцы» звязанае з канфліктамі, якія адбываюцца ў ПКК апошнім часам.

З ягоных слоў, «і ў прынцыпе як такога канфлікту ў нас няма». Усе байцы «знаходзяцца ў зоне баявой адказнасці і нясуць службу», «падпарадкоўваюцца ўкраінскай вайсковай іерархіі, вертыкалі і выконваюць загады ўкраінскага камандавання».

Адказваючы на пытанне пра камандзіра ПКК, Кабанчук сказаў, што «на гэты момант палком кіруе выканаўца абавязкаў камандзіра Павел Шурмей».

• 11
• 0
• 6
• 0
• 0
• 0
• 1
• 0