Праўладны блогер паскардзіўся ў эфіры Салаўёва на «Славянскі базар» і чыноўнікаў — пачаўся скандал
«Скажу адно: бегчы скардзіцца на расійскую публіку на беларускія ўлады — гэта поўны зашквар».
На эфір да Салаўёва паклікалі Цімура Прахіна. Ён сябе прэзентуе музыкантам, але вы можаце памятаць яго як вусача з праўладных шэсцяў (вусы ён насіў да змены іміджу).
У эфіры абмяркоўвалі будучы «Славянскі базар». І Прахін стаў біць у званы: маўляў, толькі паглядзіце, хто там будзе выступаць. Сярод іншых дасталася блогеру Дзім Дзімычу (Дзмітрыю Сіўчыку).
Прахін стаў расказваць пра тое, што Дзім Дзімыч і іншыя артысты «Флагман М'юзік» для аўдыторыі 0+ на матыў песні «Ладачкі-ладкі» спяваюць песні пра алкаголь і наркотыкі. А таксама «прапагандуюць ЛГБТ».
У тым, што артыстаў дапусцілі на «Славянскі базар», ён вінаваціць Міністэрства культуры.
«Усё, што адбываецца на «Славянскім базары» з дзіцячым канцэртам, блогерамі, якіх цягнуць на эстраду, навязваюць нашым дзецям, — міна, бомба пад нашага прэзідэнта. Як і кім яна была закладзена, пры якіх абставінах, трэба разбірацца. Але ў тым, што гэта сапраўды міна пад прэзідэнта, я ўпэўнены»,
— казаў Прахін.
Яго выступ перапосціла прапагандыстка БТ Ксенія Лебедзева з прыпіскай, што падтрымлівае погляды блогера.
«Такія дзеянні нагадваюць псіхалагічную аперацыю, так званую «мяккую» сілу: здаецца, нічога страшнага, дзіцячыя свавольствы, а ў выніку спрацоўвае як бомба запаволенага дзеяння», — выказала сваю думку Лебедзева.
Праўладны канал «Графач» асадзіў Прахіна і кампанію.
«Скажу адно: бегчы скардзіцца на расійскую публіку на беларускія ўлады — гэта поўны зашквар.
Калі адмесці шалупіну, прагучала думка — у вярхах беларускай улады нібыта нейкая бел-чырвона-бела-лгбтшняя змова. Расейцам распавядаюць альбо негатыў пра Беларусь, альбо пра адсутнасць кантролю над сітуацыяй», — напісаў аўтар канала. З ім пагадзіліся і некаторыя супрацоўнікі АНТ.
Канцэрт, куды запрасілі Дзім Дзімыча, павінен адбыцца 9 ліпеня.
Сёння, дарэчы, стала вядома, што кампанія «Флагман М'юзік», якая прасоўвае Дзім Дзімыча, падала на даносчыцу Вольгу Бондараву судовы пазоў аб абароне гонару і дзелавой рэпутацыі.
Блогера-мільённіка Дзім Дзімыча, якога абвінавацілі ў прапагандзе ЛГБТ, прымусілі апраўдвацца на стрыме ў Азаронка
Пасля даносаў прарасійскіх актывістаў папулярнаму сярод падлеткаў блогеру Дзім Дзімычу забаранілі выступаць у школах
На Славянскім базары выступіць адна артыстка з Украіны. Чаму ў Ані Лорак такая пазіцыя?
Каментары