Шквал атак украінскіх беспілотнікаў на расійскія НПЗ рызыкуе парушыць працу сусветных рынкаў нафтапрадуктаў
Згодна са штомесячнай справаздачай Міжнароднага энергетычнага агенцтва, спыненне пашкоджаных нафтаперапрацоўчых заводаў або ўстановак на рамонт на тэрмін ад чатырох да васьмі тыдняў «можа азначаць значныя страты» расійскага экспарту нафтапрадуктаў.
Як адзначае выданне Bloomberg са спасылкай на справаздачу Міжнароднага энергетычнага агенцтва (МЭА) у Расіі ў гэтым квартале ў выніку атак украінскіх беспілотнікаў на нафтаперапрацоўчыя заводы і ўстаноўкі могуць быць адключаны магутнасці на перапрацоўку ад 500 тысяч да 600 тысяч барэляў у дзень.
Спыненне на рамонт прадпрыемстваў на тэрмін ад чатырох да васьмі тыдняў, як адзначаецца ў справаздачы МЭА, «можа азначаць значныя страты», бо міжнародныя рынкі «залежаць ад расійскага экспарту дызельнага паліва, ліграіну і авіяцыйнага паліва, а нафтаперапрацоўчыя сістэмы ў Азіі паглынаюць значныя аб'ёмы прамой і крэкінг-рэшты, каб павялічыць колькасць сыравіны для ўстановак па перапрацоўцы».
Як адзначае МЭА, афіцыйныя штотыднёвыя даныя па аб'ёме вытворчасці на расійскіх НПЗ за канец сакавіка сведчаць, што аб'ём перапрацоўкі нафты склаў ад 5 да 5,2 мільёна барэляў у дзень, а ў першыя дні красавіка — 5,25 мільёна, што значна ніжэй за паказчык у 5,78 мільёна барэляў, якія былі перапрацаваныя ў той жа перыяд мінулага года, але значна вышэй за прагноз МЭА на гэты квартал у 4,6 мільёна барэляў.
Выданне звяртае ўвагу, што некаторыя прадпрыемствы Расіі адносна хутка адрамантавалі пашкоджанае абсталяванне. Па-ранейшаму не працуе толькі Туапсінскі НПЗ, што патрапіў пад атаку ў канцы студзеня. Але незразумела, ці звязана гэта з ударам беспілотніка або з першапачатковым планавым рамонтам. Хутчэй за ўсё, адзначае МЭА, ён адновіць працу ў сярэдзіне мая.
Каб змякчыць наступствы нападаў дронаў напярэдадні сезоннага росту попыту, расійскія нафтаперапрацоўчыя заводы таксама задзейнічалі рэзервовыя ўстаноўкі па перапрацоўцы нафты або тыя, якія недастаткова выкарыстоўваюцца.
Паводле ацэнак МЭА, здабыча нафты ў Расіі ў другім квартале складзе ў сярэднім каля 9,1 мільёна барэляў у дзень, што на 300 тысяч барэляў у дзень менш, чым у папярэднія тры месяцы.
Каментары