Стаў вядомы новы лаўрэат літаратурнай прэміі «Гліняны Вялес». Прэміяй за 2023 год узнагароджаны празаік Юры Станкевіч (пасмяротна) за агульны ўнёсак у беларускую літаратуру, піша Радыё Рацыя.
Раней ніколі прэмія «Гліняны Вялес» не прысуджалася пасмяротна. Гэтым разам зрабілі выключэнне.
Кажа старшыня арганізацыйнага камітэту літаратурнай прэміі «Гліняны Вялес» Алесь Аркуш:
— Раней ніколі прэмія «Гліняны Вялес» не прысуджалася пасмяротна. Гэтым разам мы вырашылі зрабіць выключэнне і ўшанаваць блізкага нам па творчых, маральных і жыццёвых перакананнях празаіка Юрыя Станкевіча. Пісьменніка не стала ў 2021 годзе. Двойчы яго кнігі намінаваліся на Вялеса. Яго творы заўсёды былі з намі побач. Гэтым разам мы хочам выправіць ранейшую прыкрую памылку і ўшанаваць прэміяй ТВЛ Юрыя Станкевіча.
«Нам вельмі хацелася б, каб імя Юрыя Станкевіча было ў шэрагу нашых лаўрэатаў», — адзначаецца ў паведамленні арганізацыйнага камітэта прэміі.
***
Юры Станкевіч нарадзіўся 21 студзеня 1945 года ў Барысаве. Бацька пісьменніка ў 1946 годзе быў рэпрэсаваны паводле 58-га артыкула КК і накіраваны ў Карлаг.
Станкевіч быў літаратурным супрацоўнікам, загадчыкам аддзела часопіса «Маладосць», загадчыкам аддзела часопіса «Крыніца». З 1990 года — сябра Саюза беларускіх пісьменнікаў.
Найважнейшыя кнігі: «Любіць ноч — права пацукоў» (1998), «Апладненне ёлупа» (2005), «Мільярд удараў» (2008), «П’яўка» (2010).
Памёр 22 кастрычніка 2021 года ва ўзросце 76 гадоў.
Гліняны Вялес — штогадовая літаратурная прэмія, заснаваная ў 1993 годзе членамі Таварыства Вольных Літаратараў. Старшыня арганізацыйнага камітэта Алесь Аркуш. Прысуджаецца за найлепшую мастацкую беларускамоўную кнігу года. Лаўрэат атрымлівае сімвалічную ўзнагароду — гліняны стод апекуна мастацтва. Стаць лаўрэатам прэміі можна толькі аднойчы.
Аўтаслесар, афіцыянт, танцор у Тайландзе, ролі ў «Мухтары» і «Сватах». Пяць фактаў пра новага міністра культуры Чарнецкага13
Каментары