Памерла Анжаліка Калатазішвілі. Актывістка са Слаўгарада змагалася за сваё жыццё пасля памылковай аперацыі

«Змагаюся за жыццё, пакуль няма чым пахваліцца. Папала на гемадыяліз. 10 дзён комы. Не ведаю, ці ачуняю. Перажываю за сваіх катоў і сабак», — напісала Анжаліка Калатазішвілі за месяц да смерці.

А потым перастала апавядаць пра сябе ў сацыяльных сетках, а сёння стала вядома, што яна памерла 23 лютага. Ёй было 53 гады.

Анжаліка Калатазішвілі са Слаўгарада. З 27 гадоў працоўнага стажу трынаццаць яна адрабіла ў мясцінах, забруджаных з-за Чарнобыльскай катастрофы радыяцыяй. Гэта адбілася на здароўі. Праявіліся праблемы з шчытавіцай, пачалі разбурацца косткі.

Анжаліка казала, што ў 2011 годзе лекары дыягнаставалі ў яе рак: саркому маткі, якую выдалілі разам з яечнікамі.

Пасля аперацыі гісталагічны аналіз паказаў, што анкалогіі ў пацыенткі не было. Дадатковае абследаванне пацвердзіла захворванне шчытападобнай залозы, з-за якога ў касцях не трымаўся кальцый.

Анжаліка дамагалася пакарання вінаватых. Пісала ў пракуратуру і ў Адміністрацыю Лукашэнкі. Адусюль прыходзілі адпіскі.

Жанчына спадзявалася, што яе змаганне зменіць падыходы ў дыягнаставанні хваробаў і людзям не давядзецца прайсці тое, што яна.

У 2013 годзе пасля чатырох аперацый Анжаліцы далі інваліднасць першай групы. Выдалі вазок. За тры гады лячэння ў яе атрафіраваліся цягліцы. Але жанчына здолела паставіць сябе на ногі. Самастойна выходзіла на вуліцу, праўда, трымаючыся за вазок.

Па яе словах, калі з'явілася без яго на медыка-рэабілітацыйную экспертную камісію, то чыноўнікаў гэта шакавала. Яны не спадзяваліся, што жанчына наогул выжыве. 

Павялічыць

У 2014 годзе Анжаліка выйшла замуж за грамадзяніна Грузіі Кахабера Калатазішвілі, з якім пазнаёмілася ў сацыяльнай сетцы. У 2018-м яго затрымалі па абвінавачанні ў распаўсюдзе наркатычных рэчываў.

Калі ён быў пад следствам, Анжаліцы не давалі спаткання з ім. Тады яна абвясціла галадоўку. Трывала яе пад магілёўскай турмой. Гэта падзейнічала.

Кахабера Калатазішвілі асудзілі на два гады і дэпартавалі на радзіму. Анжаліка дамагалася, каб яму дазволілі вярнуцца, але марна. Пазней яна даведалася, што ён жыве з іншай жанчынай.

Анжаліка лічыла, што мужа зняволілі з-за яе ўпартасці ў абароне сваіх правоў.

Яна сама трапіла пад пераслед за падпіскі на «экстрэмісцкія каналы».

Апошнія гады Анжаліка прысвяціла клопату аб бадзяжных жывёлах. У яе дома пастаянна перабывалі каты і сабакі. Некаторых яна сабе знаходзіла на вуліцах, а іншых падкідвалі.

Сваю невялікую пенсію жанчына траціла на гадаванцаў. Звярталася да людзей аб дапамозе ў набыванні корму для іх. 

Яшчэ яна шыла лялек.

Пахавалі Анжаліку Калатазішвілі ў яе родным Слаўгарадзе, вуліцамі якога яна любіла прагульвацца. Часта прыходзіла на мясцовае замчышча, каб паглядзець на Сож і яго наваколле.

Глядзіце таксама:

«Боль ніколі не знікае». Кацярына Ваданосава — пра жыццё пасля раку і змены, якія цяжка прыняць

Лукашэнка сцвярджаў, што кавід можа быць «лекам» ад анкалогіі. А што пра ўплыў кавіду на рак пішуць у свеце?

Мігрантка з Эфіопіі цяжарнай ляцела ў Еўрасаюз, а нарадзіла ў Магілёве

93-гадовы ветэран: Які парад, навошта?! Хіба Лукашэнку карціць паказацца ў маршальскім мундзіры

• 3
• 0
• 4
• 3
• 2
• 115
• 7
• 0