Грамадства

Ішлі па дзяўчынку, а тут «зноў двойня». Як бацькі з Баранавічаў гадуюць дзве пары двайнятак 

Сям'я Паліны і Максіма Маславых — унікальная: яны выхоўваюць дзве пары двайнятак. Выданне Bar24 пабывала ў іх у гасцях і даведалася, як гэта — адразу стаць бацькамі «ў квадраце» і пачуць пра двайнят паўторна.

Дзеці Паліны і Максіма Маславых: Яраслаў, Мірон, Цімафей, Васіліса (злева направа)

Старэйшым сынам Маславых, Цімафею і Яраславу, у снежні 2023 года споўнілася 7 гадоў. Малодшыя двайняты, Васіліса і Мірон, адзначылі сваё двухгоддзе ў лістападзе.

«Спачатку быў шок. Шок быў ва ўсіх»

Першы раз Паліна Маслава стала мамай, калі ёй было каля 20 гадоў. Каледж па спецыяльнасці эканаміст яна заканчвала ўжо будучы цяжарнай. Пасля апошняга іспыту паехала на УГД і даведалася, што ў яе будзе двойня.

«Спачатку быў шок. Шок быў ва ўсіх! Муж, мая мама і бабуля не маглі зразумець: адкуль?! У нас у сям'і па жаночай лініі ні ў каго няма двойні, — са смехам успамінае Паліна. — Праз нейкі час, калі крыху адышла ад гэтай навіны, падумала: «Вось і добра. Адстраляюся за адзін раз».

Нарадзіліся хлопчыкі — Цімафей і Яраслаў.

Калі Максім прыходзіць з працы, дзеці паўгадзіны не адыходзяць ад яго

Дапамагалі ўсе

Паліна не хавае: спраўляцца з двума адразу вельмі складана. А тут яшчэ першынцы, і з многімі пытаннямі даводзілася сутыкалася ўпершыню.

«Адзін хоча спаць, другі есці. Хтосьці заснуў, а другі ніяк не хоча спаць. А апрануць адразу дваіх! І так па крузе. Пакарміць, памыць, папраць, прыбраць — гэты кругаварот не сканчаецца. Складана было і маральна, і фізічна», — тлумачыць жанчына.

Дапамагалі маладой маме ўсё: і мама Паліны, і бабулі, і муж. Калі малым было каля паўгода, з сацабароны выдзелілі няню. Стала лягчэй.

Яраслаў любіць музыку
Цімафей любіць маляваць

Захацелі дачку, а на УГД кажуць: «У вас зноў двойня»

Праз тры гады, калі хлапчукі пайшлі ў дзіцячы садок, Паліна і Максім задумаліся пра дачку.

«Я вельмі хацела дзяўчынку-прынцэсу. Наважыліся з мужам на другую цяжарнасць. І вось праз чатыры з паловай гады зноў ляжу я цяжарная на УГД, а мне кажуць: «У вас зноў двойня». У мяне вочы акругліліся. Такога не чакаў ніхто! А ў радні шок не праходзіў цэлы месяц! — расказвае Паліна.

Радасць (абяцалі дзяўчынку, а магчыма, і дзвюх) перамагла страхі аб складанасцях. Тым больш што вопыт гадаваць двойню ўжо быў. Таму ўсю астатнюю цяжарнасць, па словах Паліны, яна марыла пра прыгожыя строі для сваіх прынцэс.

У лістападзе 2021 года нарадзіліся Васіліса і Мірон.

Тры волаты і прынцэса

Цяпер у сям'і Маславых растуць тры волаты і прынцэса Васіліса — адзіная і непаўторная.

Першы вопыт выхавання двайнятак, кажа Паліна, не прайшоў дарма. І няня з'явілася, калі малым было па 3 месяцы. Па словах мамы двайнятак, няня для яе — гэта вялікая дапамога. Ёсць магчымасць спакойна схадзіць у краму за прадуктамі, не спяшаючыся прыгатаваць абед і вячэру. Або забраць старэйшых са школы, калі ў мужа не атрымліваецца.

Яраслаў (на фота) і Цімафей ходзяць у першы клас

Хоць Максім, як адзначае Паліна, узор цярплівасці і цягавітасці. Заўсёды дапамагае з дзецьмі і выдатна спраўляецца з іх капрызамі.

«Трэба памяняць падгузнікі — без праблем. Трэба пакарміць — калі ласка. Трэба пасядзець з дзецьмі — заўсёды дапаможа, калі не на працы. Дзеці вельмі любяць гуляць з ім. Максім умее і любіць гэта рабіць. У яго гэта атрымліваецца весела і шумна. Таму, калі Максім прыходзіць з працы, дзеці паўгадзіны не адыходзяць ад яго», — расказвае мама двайнятак.

«Мама прадала кватэру, а мы купілі дом»

Сям'я Маславых, калі нарадзілася першая двойня, спачатку жыла ў двухпакаёвай кватэры ў баранавіцкім мікрараёне «Бароўкі», якую купіла ў крэдыт. Каля двух гадоў таму маладыя бацькі з дзецьмі пераехалі ў прыватны дом.

«Калі нарадзіліся другія малыя, нам пералічылі квадратныя метры і з улікам двухпакаёўкі, якая яшчэ ў крэдыце, выдзелілі субсідыю як шматдзетнай сям'і на адсутныя метры, — расказвае Паліна. — Марылі пра свой дом. Але грошай на куплю большага жылля, нават з улікам субсідыі, не хапала. Мая мама прадала сваю кватэру, пераехала ў нашу, а мы купілі дом. Цяпер, калі ў нас чацвёра дзяцей, свой дом — проста выратаванне».

Асноўныя выдаткі — камуналка, крэдыты і прадукты

Па словах жанчыны, агульны бюджэт іх сям'і складае каля 2 800 рублёў. Гэта з улікам дзіцячай дапамогі. Большая частка грошай ідзе на камуналку, крэдыты-растэрміноўкі за кватэру, бытавую тэхніку і новыя дзверы, а таксама на прадукты харчавання.

«У першыя месяцы пасля нараджэння дзяцей вельмі шмат грошай ідзе на памперсы. На месяц ад 3 да 5 пачкаў. Калі малых адразу двое, расход двайны. Да таго ж дзеці інтэнсіўна растуць, кожны сезон трэба купляць вопратку, абутак, — пералічвае Паліна. — Новую цацку таксама хочацца купіць. Купіш старэйшым, малодшыя пачынаюць забіраць у іх. Таму цацкі, калі купляем, то адразу чатыры».

Бываюць і іншыя, менш радасныя выдаткі. Лекі, напрыклад. Хварэць абыходзіцца дорага. А ў вялікай сям'і, калі захварэла адно дзіця, пачынаюць хварэць усе дзеці.

На сябе ёсць час, калі дзеці спяць

Кожны дзень Паліны аднолькавы вось ужо 7 гадоў. Гатаванне, мыццё, прыбіранне — гэта асноўнае, што робіцца штодня і па некалькі разоў на дзень. На сябе час, як прызнаецца жанчына, застаецца толькі ўвечары, калі ўсе дзеці спяць.

«Увечары я магу расслабіцца, прыняць ванну або паглядзець нейкі фільм. Днём на сябе няма часу. А часам так хочацца проста паляжаць, паглядзець серыял. Каб ніхто не пішчаў, не прасіў есці ці яшчэ нешта», — з усмешкай расказвае Паліна.

«Не ўяўляем, як можна жыць па-іншаму»

Асаблівых планаў на будучыню Паліна пакуль не будуе. Чакае, калі малодшыя пойдуць у дзіцячы садок, а затым збіраецца «трохі перавесці дух» і пайсці на «аддаленку». Яна разумее, што з чатырма дзецьмі ёй будзе складана ўладкавацца на працу з жорсткім графікам. Таму ў планах асвоіць аддаленую прафесію.

«Так, быць бацькамі дзвюх пар двайнятак складана. Але гэта часовыя складанасці, пакуль дзеці маленькія. Мы разумеем, што гэта вялікая адказнасць, у чымсьці даводзіцца сябе абмяжоўваць. Але мы ні разу не пашкадавалі, што лёс так распарадзіўся. Глядзіш, як яны растуць, развіваюцца, як старэйшыя з клопатам ставяцца да малодшых, і разумееш, што вялікая сям'я — гэта цудоўна! Быць бацькамі двух двайнятак — гэта падвойная радасць. І мы не ўяўляем, як можна жыць па-іншаму, без гэтага міні дзіцячага садка».

Каментары

У Мінску шторм вырываў дрэвы і руйнаваў рэкламныя шчыты ФОТЫ і ВІДЭА4

У Мінску шторм вырываў дрэвы і руйнаваў рэкламныя шчыты ФОТЫ і ВІДЭА

Усе навіны →
Усе навіны

У Беларусі зноў пастрожылі палітычны фільтр для экскурсаводаў. Што змянілася ў правілах атэстацыі?2

«Знаходзіцца ў знясіленым стане». Вернікі даведаліся падрабязнасці пра зняволенага ксяндза Анджэя Юхневіча

У якіх раёнах Беларусі найніжэйшыя заробкі?

Ураган ударыў па выставе МУС у цэнтры Віцебска — вецер раскідаў намёты ВІДЭА4

«Калектыўны Захад цяпер крэпасць». Гігін даводзіць, што «глабальная большасць» адправіла Захад у ізаляцыю10

«Ты русский язык понимаешь?» Мужчына на возеры ўгаворваў лебедзя аддаць яму лаўку ВІДЭА4

Адчуюць на сабе не толькі чаўнакі і перагоншчыкі. Як новыя абмежаванні ад ЕС адаб'юцца на простых беларусах15

Маркаў заклікаў замясціць YouTube, Telegram, Instagram і TikTok беларуска-расійскімі сацсеткамі14

Абноўлены «Белсат» спыніць вяшчанне праз спадарожнік?14

больш чытаных навін
больш лайканых навін

У Мінску шторм вырываў дрэвы і руйнаваў рэкламныя шчыты ФОТЫ і ВІДЭА4

У Мінску шторм вырываў дрэвы і руйнаваў рэкламныя шчыты ФОТЫ і ВІДЭА

Галоўнае
Усе навіны →