У Гродне за хабар судзяць дырэктара «АзотРамБуд». Ён нядаўна прыехаў з Азербайджана
У Гродне судзяць Джалілава Ільгара Галандара аглы (у раскладзе судоў напісана, мабыць, з памылкай — «аглу»). Чалавек з такімі досыць рэдкімі для Беларусі дадзенымі — дырэктар прадпрыемства «АзотРамБуд». Мужчына родам з Азербайджана, яго судзяць за хабар, даведаўся Hrodna.life.
Мужчыну пачалі судзіць 8 лютага ў судзе Ленінскага раёна Гродна па двух артыкулах — 430 ч. 1 КК «Атрыманне хабару» і 430 ч. 2 КК «Атрыманне хабару».
На прадпрыемстве паведамілі, што Ільгар Джалілаў у іх больш не працуе. Дырэктарам цяпер з’яўляецца Аляксандр Галгофскі, які раней быў намеснікам галоўнага інжынера — начальнікам аддзела па рамонце, эксплуатацыі і наглядзе за будынкамі. На сайце дырэктарам усё яшчэ пазначаны Джалілаў.
Ільгар Джалілаў нарадзіўся ў Азербайджане. У 2023 годзе ён расказваў, што на той момант два гады таму прыехаў у камандзіроўку ў Беларусь і зацікавіўся краінай. Супрацоўнікі спачатку паставіліся да яго з асцярогай, адзначыў ён. Таксама ён пахваліў «сацыяльную абароненасць» у Беларусі: бясплатную медыцыну і аплаты пуцёвак у санаторыі.
«Гродна Азот». Фота: t.me/azot_official
Мужчына трапіў на дошку гонару ААТ «Гродна Азот» — 2022. Апошняя згадка пра яго на сайце «Гродна Азот» датаваная студзенем 2023 года.
Рамонтна-будаўнічае ўнітарнае прадпрыемства «АзотРамБуд» створана на базе падраздзялення ААТ «Гродна Азот» цэха антыкаразійных пакрыццяў і рамонтна-будаўнічых работ у лістападзе 2013 года. 40 гадоў яны рамантавалі будынкі і збудаванні, тэхналагічнае абсталяванне і аб’екты сацкультбыту «Гродна Азот».
«Вялікі абсалютна чалавек». Коля Лукашэнка расказаў, што для яго бацька і ў чым ягоная апазіцыйнасць8
Каментары