У навагоднім віншаванні Пазняк звярнуўся да прыхільнікаў Лукашэнкі і чыноўнікаў
У навагоднім звароце, апублікаваным на Youtube, лідэр руху «Вольная Беларусь» Зянон Пазняк звярнуўся да розных катэгорый беларусаў унутры краіны і заклікаў шанаваць адзін аднаго, падтрымліваць усё беларускае, піша «Радыё Свабода».
У прыватнасці, Пазняк звярнуўся і да тых беларусаў, якія падтрымліваюць рэжым Лукашэнкі і лічаць, «што гэта добра».
«Такіх людзей шмат, і мы не можам іх ігнараваць. Але што б я хацеў сказаць такім людзям? Памятайма, што Беларусь — наш агульны дом. Мы павінны яго берагчы, усе, якім бы мы чынам не адносіліся да палітыкі. Не прадаецца хата бацькоў, як спяваецца ў песні. Таму дбайма пра нашую незалежнасць, наш агульны беларускі дом і нашу дзяржаву», — сказаў Зянон Пазняк.
Звяртаючыся да дзяржаўных службоўцаў, палітык канстатаваў, што многія з іх апынуліся ў цяжкім становішчы, калі трэба выконваць палітыку, якая не спрыяе беларускаму народу.
«Шаноўнае спадарства, не забывайце, што вы беларусы, не забывайце, што ў вашых руках улада. Будзьце патрыётамі сваёй краіны, беражыце наш народ. Можна не выконваць антынародныя распараджэнні. Можна паглядзець на нейкую злую справу, якую ад вас патрабуюць, скрозь пальцы. Можна яе не выканаць і гэтым паспрыяць нашым людзям. Калі міліцыянт ідзе па вуліцы і бачыць, што маладыя людзі кажуць «Жыве Беларусь», не кідайцеся туды, не чапайце гэтую моладзь, не біце іх дручкамі. Не заўважце гэтага, і гэтым вы дапаможаце беларусам», — заклікаў Пазняк.
Пад канец ён заклікаў Лукашэнку вызваліць траіх палітвязняў, каб праявіць добрую палітычную волю. Гаворка ідзе пра шматдзетную маці Вольгу Залатар, журналіста Дзяніса Івашына і берасцейскую актывістку Паліну Шарэнду-Панасюк.
На зіму запланаваныя масавыя затрыманні, складзеныя «першы і другі спісы»29
Каментары