Беларуска вырашыла пакінуць грошы ў камеры захоўвання крамы, бо іх не ўзялі ў банку
Дзіўная гісторыя адбылася 1 чэрвеня ў Магілёве. Ахоўнік крамы вырашыў уначы праверыць камеры захоўвання, як гэта прапісана ў яго абавязках. У адной з ячэек быў сюрпрыз: у пакеце ляжалі пачкі долараў і беларускіх рублёў. На гісторыю звярнуў увагу Onliner.
Падумаўшы, што грошы не сапраўдныя, а які-небудзь рэквізіт, ахоўнік паказаў іх прадавачцы крамы, а потым пайшоў з імі ў пакой аховы. Па правілах крамы, калі ў ячэйцы нехта пакінуў рэчы, іх захоўваюць у спецыяльным месцы, пакуль па іх не прыйдзе ўладальнік.
Але ахоўнік зразумеў, што купюры сапраўдныя, і схаваў адзін пачак купюр з 12 тысячамі рублёў. Потым супрацоўнікі крамы выклікалі міліцыю і перадалі ёй грошы.
Пакуль ніхто не ведаў, адкуль узяліся грошы ў камеры захоўвання, ахоўнік паспеў часткова іх патраціць. Ён купіў сабе ноўтбук, мабільны тэлефон, навушнікі, залаты пярсцёнак і іншыя рэчы; прадавачцы, якой ён паказваў грошы, — смарт-гадзіннік.
Сваёй маці ён перавёў 2200 рублёў, набыў мабільны тэлефон і тэлевізар, а таксама даў ёй 2400 рублёў, каб яна пагасіла крэдыты. Зʼяўленне такіх грошай ён растлумачыў тым, што знайшоў буйную суму (але падрабязнасцяў не ўдакладніў).
А потым па грошы прыйшла іх сапраўдная ўладальніца. Яна збіралася пакласці іх у банк, але ёй адмовілі. Не знайшоўшы нічога ў камеры захоўвання, яна пайшла з заявай у міліцыю.
Па словах жанчыны, у яе не было магчымасці захоўваць гэтыя грошы (21 тысячу рублёў і 21 тысячу даляраў) пры сабе або ў якім-небудзь іншым месцы, яна вырашыла пакінуць іх на некалькі дзён у камеры захоўвання крамы.
Суд Кастрычніцкага раёна Магілёва прызнаў ахоўніка вінаватым у крадзяжы і прызначыў пакаранне ў выглядзе абмежавання волі тэрмінам на 2 гады 6 месяцаў без накіравання ў папраўчую ўстанову адкрытага тыпу. З прысуду вынікае, што ўсе набытыя ім рэчы канфіскаваныя, а ён застаўся вінен жанчыне яшчэ 3550 рублёў.
Стала вядома, што за дамову ўчора падпісалі Лукашэнка з Пуціным15
Каментары