Не ўсё так радасна, як можа здацца. Якія пошліны на аўто існуюць у ЕС
У Беларусі дзейнічаюць даволі высокія пошліны на ўвоз аўто. Праз гэта аўтамабілі каштуюць значна даражэй, чым у заходніх краінах-суседках. «Наша Ніва» разбіралася, якое мыта дзейнічае ў ЕС, калі аўтамабіль імпартуецца, напрыклад, з ЗША.
Мытныя пошліны на ўвоз аўтамабіляў у Беларусь складана назваць маленькімі, асабліва калі плаціць мыта без 50% зніжкі згодна са 140-м указам, што на практыцы робіцца рэдка. Бо калі чалавек сам не мае права на льготу, то знаходзіць тых, у каго яна ёсць.
Аўтамабілі падзяляюцца на тры катэгорыі
За машыны, не старэйшыя за тры гады (у тым ліку новыя), пошліна складае 48 або 54% ад кошту.
Найменшыя тарыфы прымяняюцца для аўто ва ўзросце ад 3 да 5 гадоў. У народзе іх называюць «прахаднымі». Большасць машын, якія едуць да нас з Еўропы і ЗША, падпадае менавіта пад гэтую катэгорыю.
Для аўтамабіляў, якім ужо споўнілася 5 гадоў, дзейнічаюць павышаныя тарыфы. Але іх таксама прыганяюць, хоць і значна радзей за «прахадныя».
Калі аўтамабіль імпартуецца ў Беларусь з краіны ЕАЭС, то мыта плаціць не трэба.
Але зусім без папаўнення бюджэту не абысціся, бо ўтылізацыйнага збору ніхто не адмяняў. Для легкавікоў ён складае ад 544,5 да 1 225,1 рубля (гэта каля 155—370 еўра).
А што ў краінах ЕС?
Пры куплі аўто ў краінах ЕС плаціць мыта не трэба. То-бок умоўны жыхар Літвы ці Латвіі можа набыць аўто ў любой іншай краіне ЕС, прывезці яго да сябе ў краіну і паставіць на ўлік, не заплаціўшы ані цэнта пошліны. Але ў некаторых асобных краінах ЕС ёсць свае падаткі ці акцызы, якія трэба плаціць пры імпарце аўто. Калі казаць менавіта пра мыта, то ў межах ЕС яно цалкам адсутнічае.
Зусім іншая карціна вымалёўваецца, калі аўто імпартуецца ў ЕС з трэціх краін, напрыклад, з ЗША. Такія аўтамабілі ўжо абкладаюцца мытам. Для ўсіх краін саюза стаўка аднолькавая — 10% ад кошту. Але, апроч пошліны, давядзецца плаціць мясцовы ПДВ. Нават з улікам таго, што купец — фізічная асоба. Стаўка ПДВ у кожнай краіны свая. Напрыклад, у Нямеччыне гэта 19%, у Літве — 21%, а ў Польшчы — 23%.
У адрозненне ад Беларусі, мытная стаўка ў ЕС не залежыць ад аб'ёму рухавіка і года выпуску аўто. Адзіны крытэр, ад якога залежыць мытны плацеж, — кошт аўтамабіля. Аўтамабілі, старэйшыя за 30 гадоў, мытам не абкладаюцца.
Але, нягледзячы на наяўнасць мыта ў 10% і патрэбы плаціць ПДВ, еўрапейцы купляюць патрыманыя аўто са Штатаў, хоць такой папулярнасці, як у Беларусі, імпарт аўто з-за акіяна ў ЕС не мае.
Са Штатаў у ЕС часцей за ўсё вязуць амерыканскія маслкары тыпу Ford Mustang, Dodge Challenger, пікапы і джыпы амерыканскай вытворчасці.
Што ў выніку?
Каб зразумець, хто заплаціць больш мыта пры імпарце аўто з ЗША, пакупнік з ЕС ці з Беларусі, мы падлічылі некалькі варыянтаў.
Для першага прыкладу возьмем Ford Mustang 2020 года выпуску з рухавіком аб'ёмам 2,3 літра.
Аўтамабіль, на прыкладзе якога будуць рабіцца разлікі, быў прададзены 1 верасня гэтага года на аўкцыёне ў ЗША за $10 400. З улікам збораў аўкцыёну (каля $900) кошт аўто складае каля $11 300. Яшчэ не менш за 1500 даляраў пойдзе на транспарціроўку аўто ў Еўропу.
У выніку мытная вартасць аўто будзе складаць каля $12 800. Менавіта ад гэтай сумы еўрапейская мытня будзе вылічваць плацеж. То-бок мыта ў ЕС за гэты аўтамабіль складзе 1280 даляраў ЗША.
Але на гэтым плацяжы не скончацца, бо трэба аплаціць ПДВ. Для разліку будзем браць літоўскі 21%, бо гэта акурат сярэдні паказчык паміж Германіяй (19%) і Польшчай (23%). ПДВ налічваецца да цаны размытненага аўто. То-бок ужо з $14 080. Гэта яшчэ 2957 даляраў ЗША ў выглядзе ПДВ.
У Польшчы плацяць больш за ўсіх?
Атрымліваецца, што мытная ачыстка «Мустанга», набытага ў ЗША за $11 300, абыдзецца еўрапейцу ў $4240, ці каля 3850 еўра. Прыкладна столькі заплацяць жыхары Літвы, Латвіі, Германіі і іншых краін ЕС, дзе няма ніякіх дадатковых мясцовых плацяжоў, апроч агульнаеўрапейскай пошліны і ПДВ.
А вось палякам пашанцавала менш. У Польшчы існуе акцыз на аўтамабілі. Для аўто з рухавіком аб'ёмам да 2 літраў ён складае 3,1%, а калі звыш 2 літраў — то 18,6%. Плаціць яго трэба ад цаны аўто ў ЗША. У нашым выпадку ад цаны $11 300, а гэта яшчэ $2100, ці амаль 2000 еўра.
Акцыз, дарэчы, палякі вымушаныя плаціць незалежна ад таго, з якой краіны прыехаў аўтамабіль. Нават калі гэта будзе машына, набытая ў межах ЕС, то акцыз усё адно давядзецца плаціць. Таму палякі часцей стараюцца прывозіць машыны з рухавіком да 2 літраў, каб плаціць 3,1% акцызу, а не 18,6.
Калі гэты самы аўтамабіль размытнёўваць у Беларусі, то мыта і ўтылізацыйны збор пацягнуць на 3340 еўра, калі афармляць аўто на льготніка (як звычайна ўсе і робяць), ці на 6445 еўра, калі браць поўны тарыф.
На гэтым прыкладзе бачна, што мытная ачыстка гэтага экзэмпляра ў ЕС і Беларусі абыдзецца прыблізна ў аднолькавую суму. Канешне, калі не браць Польшчу з яе дадатковым акцызам.
Сачыце за лічбамі
Аднак прыклады могуць быць іншымі, што можна пабачыць на іншым Ford Mustang.
Гэты аўтамабіль таксама днямі быў прададзены на адным з аўкцыёнаў у ЗША. Год выпуску той самы — 2020-ы. Але пад капотам тут ужо рухавік з аб'ёмам не 2,3 літра, а 5,0. Цана з улікам аўкцыённага збору і дастаўкі — каля $15 800.
У выніку сукупны плацеж мыта 10% плюс ПДВ 21% складзе $5230, ці каля 4750 еўра ў Літве.
У Беларусі мыта за аўто ва ўзросце ад 3 да 5 гадоў з рухавіком аб'ёмам 5,0 складае 9000 еўра, і гэта калі размытнёўваць яго на льготніка. Адпаведна поўная стаўка будзе ўжо 18 тысяч еўра.
Такім чынам, з улікам утыльзбору і выкарыстаннем ільготы мытная ачыстка абыдзецца ў 9250 еўра, што амаль у два разы больш, чым у ЕС.
Не ўсё так адназначна
Для параўнання яшчэ возьмем такі аўтамабіль, як Porsche Macan 2020 года выпуску з двухлітровым рухавіком пад капотам, які таксама нядаўна прадалі на аўкцыёне ў ЗША. З улікам аўкцыённага збору кошт аўтамабіля складае каля $27 700, дадаём 1500 на дастаўку — і маем $29 200.
У ЕС пошліна і ПДВ за такое аўто пацягне на $9670, ці каля 8800 еўра. А калі браць у разлік Польшчу, то яшчэ каля 800 еўра пацягне акцыз (3,1%).
А каб размытніць гэты самы аўтамабіль у Беларусі, вам давядзецца заплаціць усяго 2950 еўра. Гэта амаль у тры разы менш, чым у ЕС. Столькі складае льготная пошліна разам з утылізацыйным зборам.
Але нават з улікам аплаты пошліны па поўным тарыфе выйдзе 5650 еўра. Пры гэтым калі браць да разліку такі самы аўтамабіль, толькі ўжо 2021 года выпуску, то льготная размытнёўка ў Беларусі абыдзецца ўжо ў 6000 еўра, а поўная — у 12 тысяч. А ў ЕС яна застанецца такой самай (8800 еўра), бо там ва ўсіх выпадках мыта разлічваецца ад цаны аўто, а не ад аб'ёма рухавіка.
Чытайце таксама:
Глядзіце і плачце. Колькі маглі б каштаваць аўтамабілі, калі б Беларусь не ўступіла ў Мытны саюз
За колькі перапрадаюць «блатныя» аўтамабільныя нумары? Цэны ўражваюць
Мінская фірма прапануе машыны з Еўропы на замову па нерэальна нізкіх цэнах. У чым падвох?
Былая жонка Камісаранкі расказала, чаму схавала ад яго сваё мінулае вэбкам-мадэлі16
Каментары