Вярхоўны суд разгледзіць пазоў аб ліквідацыі яшчэ адной праўладнай партыі. Ужо ліквідавалі больш за палову партый
Гэтым разам будзе разгледжаны пазоў аб ліквідацыі праўладнай Беларускай сацыяльна-спартыўнай партыі.

Суддзя Наталля Андрэева пачне працэс, ініцыяваны Міністэрствам юстыцыі, 4 верасня ў 15:00, піша «Позірк».
Паводле даных з Адзінага дзяржаўнага рэгістра, БССП зарэгістраваная 9 снежня 1994 года.
Партыя палітычна неактыўная. За час існавання партыі толькі пяцёра яе членаў пабывала ў выбарных органах улады — адзін у статусе дэпутата Палаты прадстаўнікоў (2000 год) і чацвёра ў якасці дэпутатаў мясцовых Саветаў (2018 год). У асноўным партыя, лаяльная да рэжыму Аляксандра Лукашэнкі, прасоўвала сваіх прадстаўнікоў у выбарчыя камісіі падчас электаральных кампаній.
Вярхоўны суд ліквідаваў восем партый: апазіцыйныя Кансерватыўна-хрысціянскую партыю — БНФ, Партыю БНФ, Беларускую сацыял-дэмакратычную Грамаду, партыю «Зялёныя», Аб'яднаную грамадзянскую партыю, а таксама праўладныя Беларускую патрыятычную партыю, Рэспубліканскую партыю, Сацыял-дэмакратычную партыю Народнай згоды. Відаць, будзе ліквідавана і партыя «Справядлівы свет».
У Беларусі на пачатак года было 15 партый, засталося восем з улікам навастворанай партыі «Белая Русь» або сем, калі палічыць «Справядлівы свет».
Былі перарэгістраваныя Камуністычная партыя Беларусі, Ліберал-дэмакратычная партыя, Рэспубліканская партыя працы і справядлівасці.
Каментары