На адкрыцці «Канферэнцыі новай Беларусі» Ціханоўская анансавала кадравыя змены і часова сышла

Канферэнцыя «Новая Беларусь 2023» пачалася з хвіліны маўчання ў памяць пра загінулых за свабоду Беларусі. 

Удзельнікаў канферэнцыі прывітала Святлана Ціханоўская.

Яна прыгадала сваё хваляванне перад Марафонам салідарнасці — ці ўдасца дасягнуць пастаўленых мэтаў. Бо беларусы звыкліся з найгоршым. Звыкліся, што нас ставяць у адзін шэраг з агрэсарам — Расіяй, што не зможам магічным чынам завяршыць вайну, гаварыла Ціханоўская.

Павялічыць

«Я заклікаю, каб мы пазбавіліся гэтай дрэннай звычкі. Давайце верыць! Нас труціць звычка рыхтавацца да найгоршага», — сказала Святлана Ціханоўская.

Яна падкрэсліла, што цяпер існуе шмат нацыянальных ініцыятываў. Што беларускія вайсковыя падраздзяленні, якія ваююць ва Украіне, паказваюць усяму свету, што Беларусь не разам з Расіяй.

Паводле Святланы Ціханоўскай, учора былі распрацаваныя некалькі дэкларацый, якія прапануецца падтрымаць дэмакратычным сілам. Мінулая канферэнцыя, сказала Ціханоўская, не вырашыла шмат якіх пытанняў і з’явілася шмат новых. Бо шлях да новай Беларусі складаны. «Але мы асілім гэты шлях», — сказала яна. 

Канферэнцыя мае даць адказ, што яшчэ могуць зрабіць дэмсілы, каб узмацніць адно аднаго і каб адрадзіць новую Беларусь.

Ціханоўская заявіла, што сёння ўвечары агучыць некаторыя кадравыя змены, з улікам абмеркаванняў, якія прайшлі ў Каардынацыйнай радзе.

Канферэнцыя «Новая Беларусь 2023», арганізаваная Офісам Святланы Ціханоўскай, Аб’яднаным пераходным кабінетам і Каардынацыйнай Радай, праходзіць у Варшаве 6 жніўня. 

Запланаваны выступы і абмеркаванні ў трох панэлях: «Што зрабілі і што збіраюцца зрабіць дэмакратычныя сілы для пераходу да дэмакратыі?», «Ад саюза з агрэсарам да новых магчымасцяў: еўрапейскі выбар для Беларусі» і «Новая Беларусь: якую краіну мы хочам пабудаваць?».

Павялічыць

Апрача ўдзелу афлайн, арганізатары прапанавалі ўсім ахвотным праз адмысловае анкетаванне падзяліцца думкамі наконт працы дэмакратычнай супольнасці і Святланы Ціханоўскай, выказаць пажаданні і крытычныя заўвагі. Мяркуецца, што яны будуць агучаны падчас канферэнцыі. 

Напярэдадні імпрэзы адбыўся і круглы стол палітычных лідараў. У ім узялі ўдзел больш за 50 палітыкаў і актывістаў. Падчас сустрэчы яны абмяркоўвалі пазіцыі і планы дэмакратычных сілаў. Вынікі працы будуць прэзентаваныя на канферэнцыі «Новая Беларусь 2023».

Таксама анансавана прэзентацыя нацыянальнага пашпарта Новай Беларусі — дакумента, пра распрацоўку якога 1 лютага заявіў Абʼяднаны пераходны кабінет і які, як чакаюць, дапаможа беларусам за мяжою развязаць праблему пратэрмінаваных дакументаў.

Святлана Ціханоўская пасля кароткага ўступнага слова пакінула канферэнцыю «Новая Беларусь». Пра гэта яе папрасіла польская паліцыя — форум, нагадаем, праходзіць у Варшаве. Паліцыя атрымала паведамленне пра небяспеку Ціханоўскай і ажыццяўляе праверку гатэля, у якім праходзіць канферэнцыя.

Тым часам канферэнцыя працягваецца. Пасля Ціханоўскай да ўдзельнікаў з відэазваротам звярнулася старшыня Рады БНР Івонка Сурвіла, якая высока ацаніла гістарычнае значэнне падзей 2020 года. 

Першую дыскусійная панэль «Што зрабілі і што збіраюцца зрабіць дэмакратычныя сілы для пераходу да дэмакратыі?» мадэруе Зміцер Лукашук.

«Ва ўмовах акупацыі выбары немагчымыя. Трэба стратэгія: дэакупацыя, і толькі потым дэмакратычныя выбары. Якая сіла можа гэта здзейсніць? Толькі супольны вызвольны рух»,— заявіў у сваім выступе Павел «Вілі» Кухта, прадстаўнік Палка Кастуся Каліноўскага.

«Ва ўмовах вайны выйсковы кампанент непазбежны. Мы не патрабуем, каб вайсковы і палітычны кампаненты сталі нечым адзіным, але трэба працаваць супольна. Цяпер гэтай звязкі не існуе. Азараў і Сахашчык не справіліся з гэтай задачай», — заявіў Кухта.

«Вайскоўцы рызыкуюць сваімі жыццямі, палітыкі мусяць працаваць і трымаць справаздачу. Пасіўнае чаканне ў замежжы — безвыніковае, гэта падыход апартуністаў, а не выратавальнікаў краіны», — заявіў Кухта.

Каліновец выказаў спадзяванне на «сілавы, палітычны і рэсурсавы складнікі, аб'яднаныя ў вызвольны рух». Полк Каліноўскага гатовы быць вайсковым цэнтрам і гатовы да перамоваў. Кухта анансаваў канферэнцыю ў Кіеве ўвосені, каб абмеркаваць новую стратэгію змагання.

Прадстаўнік Палка Каліноўскага таксама заявіў, што ў правядзенні Марафону па зборы сродкаў для добраахвотнікаў цяпер няма патрэбы. Калі спатрэбіцца, то Полк Каліноўскага можа сам правесці марафон, заявіў Павел Кухта.

Іван Краўцоў, прадстаўнік штаба Віктара Бабарыкі, у сваім выступе падзякаваў тым, «хто не здаецца».

Ëн заявіў, што «мы зашмат гаворым пра рэжым», але змена рэжыму — гэта не пераход да дэмакратыі. Трэба, каб большасць беларусаў падтрымлівала дэмакратычныя сілы. Патрэбныя інклюзіўныя інструменты і структуры, заявіў Краўцоў.

У адказ вядоўца, журналіст Зміцер Лукашук з’едліва заўважыў, што ў выступе нічога не пачуў у якасці справаздачы пра дзейнасць штаба Бабарыкі.

Крысціна Рыхтэр, дарадца Святланы Ціханоўскай па прававых пытаннях, прызнала, што ў кірунку правядзення працэсаў адносна злачынстваў, здзейсненых у 2020 годзе, у рамках універсальнай юрысдыкцыі няма даведзеных да суда справаў (гэта пытанне крымінальнага працэсу ў краінах, дзе заведзеня справы), але яны заведзены і разглядаюцца. 

Павел Латушка заклікаў удзельнікаў канферэнцыі да большага рэалізму: [Ëсць] недахоп чалавечага рэсурсу, якія проста рабілі б справы. Хто будзе на месцы Азарава, калі яго выключыць? Хто гатовы прыняць ягоныя абавязкі?

Латушка выказаў падзяку Палку Каліноўскага за тое, што яны выказалі ініцыятыву сабрацца ў Кіеве. «Трэба аб'ядноўвацца, і хоць усіх аб'яднаць немагчыма, большасць можа быць аб'яднаная», — заявіў ён.

Тым часам стала вядома пра смерць яшчэ аднаго добраахвотніка, які ваюе ва Украіне. Гэтым разам гэта не баец Палка Каліноўскага, а беларус, які ваяваў за свабоду Беларусі і Украіны ў шэрагах Другога інтэрнацыянальнага легіёна. Гэта ўжо 32-і беларус, які загінуў у вайне за незалежнасць Украіны.

* * *

Праграма Канферэнцыі тут. Свае пытанні можна пісаць у каментарах, вядоўцы будуць задаваць іх удзельнікам. 

Але калі вы цяпер у Беларусі або ездзіце ў Беларусь, у мэтах бяспекі не рэпосціце, не лайкайце і не каментуйце эфіру са сваіх персанальных акаўнтаў.

Анлайн-трансляцыя канферэнцыі будзе ісці на канале «Белсата» ў Ютубе.

• 43
• 10
• 8
• 4
• 4
• 11