«Грантасосы купаюцца ва ўзаемным крывадушшы». Цапкала апляваў марафон салідарнасці
Марафон салідарнасці з палітвязнямі «Нам не ўсё адно» сабраў 574 тысячы еўра. Не ўсе палічылі гэта поспехам. Былы кіраўнік ПВТ і прэтэндэнт на прэзідэнцтва Валерый Цапкала адрэагаваў серыяй крытычных допісаў.
Збор сродкаў на аказанне дапамогі палітвязням — крывадушнасць, напісаў Цапкала ў сваім тэлеграм-канале. Ëн выступае за больш радыкальныя дзеянні.
«Крывадушнасць — прыцягваць да сябе ўвагу, выкарыстоўваючы трагедыю сем'яў закладнікаў рэжыму, але ігнараваць неабходнасць выдачы ордара на арышт Лукашэнкі», — напісаў былы памочнік Аляксандра Лукашэнкі.
Валерый Цапкала не шкадуе гадкіх слоў у адрас арганізатараў і ўдзельнікаў марафону: «Усе палітвязні памянялі б гэтыя 200 даляраў на волю або на вас, крывадушнікаў і падлюгаў, замест сябе за кратамі».
Першы свой допіс Валерый Цапкала праілюстраваў фотаздымкам Святланы Ціханоўскай з кіраўніком фонду «Байсол» Андрэем Стрыжаком, у адным з вуглоў якога змешчана фота Сяргея Ціханоўскага.
У допісе палітык не канкрэтызуе, як выдача ордара на арышт Лукашэнкі дапаможа палітвязням і іх сем'ям. Варта адзначыць, што Міжнародны крымінальны суд выдаў ордар на арышт Уладзіміра Пуціна за вываз украінскіх дзяцей з акупаваных тэрыторый поўдня Украіны.
«Наша Ніва» выслала Валерыю Цапкалу пытанні, чаму яго абурыў марафон салідарнасці і што ён прапануе дзеля вызвалення палітвязняў. На момант публікацыі артыкула адказу ад палітыка пакуль не было.
Валерый Цапкала перайшоў у апазіцыю да Аляксандра Лукашэнкі ў 2020 годзе. Да таго ён працаваў ягоным памочнікам, а пасля кіраўніком Парка высокіх тэхналогій. Цапкала сабраў неабходную колькасць подпісаў, каб стаць кандыдатам у прэзідэнты, але яго, як і Віктара Бабарыку, не зарэгістравалі. Пасля гэтага ягоная жонка Вераніка Цапкала адыграла, разам са Святланай Ціханоўскай і Марыяй Калеснікавай, выключную ролю ў мабілізацыі грамадства на выбары 2020 года.
Адчуваючы небяспеку, Вераніка пакінула краіну напярэдадні дня галасавання. Пасля гэтага яны з Валерыем жывуць за мяжою. Пад канец 2020 года Цапкала пачаў шукаць асобных шляхоў-дарог. Ëн увайшоў у кааліцыю з Вольгай Карач і шэрагам іншых дзеячаў другога плана.
Заявы Цапкалы адносна марафону выклікалі нямала крытычных заўваг у сацыяльных сетках, дзе вынік марафону выклікаў збольшага захапленне: людзі не чакалі такога вялізнага збору.
«Пачалося… палезлі чэрці з усіх бакоў… Два разы перачыталі плынь думак Цапкалы, аформлены ў пост, так нічога і не зразумелі», — адзначаецца ў каментары на навінным канале беларусаў Літвы Razam.
У самім тэлеграм-канале Валерыя Цапкалы допіс таксама сабраў эмацыйныя каментары.
«Бедны Валерый. Вы такі нікчэмны», — гаворыцца ў першым.
«Валерый працягвае прабіваць дно, — гаворыцца ў яшчэ адным. — Кватэрнае пытанне сапсавала масквічоў, а прагнасць, празмернае эга і, няма чаго граху таіць, простая чалавечая дурасць загубілі Валерыя», — гаворыцца ў іншым.
«Гэтым пастом вы канчаткова сябе пахавалі як палітыка, назаўжды!» — катэгарычна заяўляе трэці каментатар.
«Пры ўсім разуменні таго, што розныя групы людзей пагарджаюць адна адной, трэба прызнаць, што спосабу вызвалення асуджаных па пэўных артыкулах пакуль ніхто не прыдумаў», — гаворыцца ў іншым допісе.
Аўтары некаторых каментароў лічаць, што простая дапамога вязням — гэта недастаткова радыкальна.
«За 200 мільёнаў можна было войска наняць і хаця б паспрабаваць, але імпрэзы — гэта весела і бяспечна», — прапануе адзін з іх.
Анлайн-марафон «Нам не ўсё адно!» праводзіўся з ініцыятывы прадстаўніцы Аб'яднанага пераходнага кабінета па сацыяльных пытаннях Вольгі Гарбуновай пры дружнай падтрымцы незалежных СМІ і праваабарончых суполак, каб сабраць грошы для палітвязняў і іх сем’яў. За два дні марафону было ахвяравана 574 356 еўра.
«Гэты марафон зноў даў веру ў тое, што мы, беларусы, здольныя аб’яднацца», — заявіла лідарка беларускіх дэмакратычных сіл Святлана Ціханоўская па завяршэнні збору.
«Мы здольныя дапамагаць адно аднаму, дзе б мы ні знаходзіліся, — адзначыла яна. — Разам мы зноў паказалі ўсяму свету, што нам не ўсё адно на лёсы тых, хто цяпер знаходзіцца ў закладніках рэжыму».
Сабраныя грошы назіральная рада на чале з прадстаўніцай Аб’яднанага пераходнага кабінета Вольгай Гарбуновай мае размеркаваць паміж 13-цю ініцыятывамі і фондамі, якія займаюцца аказаннем падтрымкі палітзняволеным. Яны, у сваю чаргу, будуць адпраўляць грошы рэпрэсаваным па нябачных капілярах сістэмы дапамогі.
«Наша Нiва» — бастыён беларушчыны
ПАДТРЫМАЦЬГлядзіце таксама:
Вадзім Пракоп'еў прадставіў свой план вызвалення палітвязняў
Як схаваць, што ты данаціў праз фэйсбук? Валерый Цапкала і Андрэй Стрыжак маюць розныя меркаванні
Санкцыі для суддзяў, 30 мільёнаў еўра дапамогі, непрызнанне выбараў-2025 — расказваем пра вынікі Дзён Беларусі ў Брусэлі6
Каментары