Палітвязню Яўгену Прапольскаму дадалі да ранейшых васьмі яшчэ паўтара года зняволення
Праваабаронцам стала вядома, што ў судзе Бабруйскага раёна і горада Бабруйска 3 мая 2023 года па новай крымінальнай справе асудзілі палітвязня Яўгена Прапольскага.
Яўгена затрымалі 29 верасня 2020 года. 19 ліпеня 2021 года палітвязня асудзілі да 8 гадоў калоніі па справе «ўдзельнікаў чата». Яго прызналі вінаватым паводле ч. 1 арт. 13 і ч. 2 арт. 293 КК (падрыхтоўка да ўдзелу ў масавых беспарадках у Мінску), а таксама ч. 1 арт. 13 і ч. 3 арт. 218 КК (падрыхтоўка да наўмыснага знішчэння або пашкоджання маёмасці).
Прапольскага разам з іншымі фігурантамі справы абвінавацілі ва ўдзеле ў тэлеграм-чаце «радыкальнага напрамку». У паказаннях агучваліся некалькі чатаў — у прыватнасці, «ОГСБ» (Отряд гражданской самообороны), «Подработка Минск», «100», «101». Акрамя гэтага — у намеры пашкодзіць або знішчыць тры «Табакеркі».
На судзе палітзняволены распавёў пра катаванні:
«Мяне прымушалі пісаць чыстасардэчнае прызнанне на імя начальніка УСК. Мне пагражалі, катавалі — білі маім электрашокерам. Добраахвотна я не пісаў заявы. Потым у мяне праблемы са здароўем былі: было дрэнна, круцілася галава, была адбітая нага».
Тэрмін Прапольскага накіравалі адбываць у бабруйскую калонію №2. Вядома, што ад самага пачатку адміністрацыя калоніі ціснула на яго. Паводле інфармацыі праваабаронцаў, ён правёў не менш за 130 сутак у штрафным ізалятары, а таксама на тры месяцы яго адпраўлялі ў памяшканне камернага тыпу (ПКТ).
Акрамя гэтага, з ініцыятывы адміністрацыі калоніі супраць Прапольскага завялі крымінальную справу за «злоснае непадпарадкаванне патрабаванням адміністрацыі папраўчай установы» (арт. 411 КК). Падставай для новай справы сталі тыя ж «парушэнні» правілаў унутранага распарадку (ПУР), за якія Яўген ужо адбыў пакаранне ў выглядзе змяшчэння ў ШІЗА і ПКТ.
Паводле матэрыялаў справы, спагнанні былі выпісаныя за тое, што Яўген «ляжаў на падлозе ШІЗА»; «у катэгарычнай форме адмовіўся ад прыбірання калідора інтэрната атрада, жылой секцыі, лакальнай пляцоўкі»; «адмовіўся заняць адведзенае яму спальнае месца ў жылой секцыі»; «не прывітаўся пры сустрэчы з прадстаўніком адміністрацыі ўстановы».
Суд над Яўгенам праходзіў на выязным паседжанні ў бабруйскай калоніі. Прапольскі на судзе сваёй віны не прызнаў і пацвердзіў, што аднойчы ляжаў на падлозе камеры, але іншых парушэнняў не дапускаў. З накладзенымі на яго дысцыплінарнымі спагнаннямі ў выглядзе «сутак» у штрафным ізалятары ён не згодны, але іх не абскардзіў.
3 траўня 2023 года суддзя Павел Карцінін прызнаў палітвязня вінаватым паводле арт. 411 Крымінальнага кодэкса і прызначыў яму ў дадатак да васьмі гадоў калоніі яшчэ паўтара года пазбаўлення волі.
З улікам адбытага тэрміну і новага прысуду на пачатак траўня Яўгену заставалася адбыць у зняволенні пяць гадоў і шэсць месяцаў.
Яўген новага прысуду не абскарджваў, таму ўжо напрыканцы траўня яго перавялі ў мазырскую калонію №20. Паводле інфармацыі праваабаронцаў, з 14 чэрвеня ад яго не было аніякіх вестак.
Каментары