«Цудоўнае свята народа, які пакутуе ў цішыні». Арцыбіскуп Гуджэроці расказаў пра свой нядаўні візіт у Беларусь
Новапрызначаны кардынал Клаўдыа Гуджэроці ў інтэрв’ю выданню Vatican News падзяліўся сваімі ўражаннямі ад урачыстасці з нагоды 25-годдзя каранацыі абраза Маці Божай Будслаўскай, а таксама выказаўся пра праблемы ўсяго нашага рэгіёна.
Згадваючы свой досвед, набыты на дыпламатычнай службе ў Беларусі, Украіне і Грузіі, дзе ён быў нунцыем, Клаўдыа Гуджэроці звярнуў увагу на складаныя гістарычныя прычыны, якія стаяць за падзеямі ў гэтых рэгіёнах. На яго думку, людзі на захадзе ў сваіх «спрошчаных» каментарах гэтых падзей часта абмяжоўваюцца сённяшнім днём.
«На ўсходзе ж, калі вы хочаце зразумець сёння, вы павінны зразумець учора», — лічыць іерарх. На яго думку, на Захадзе не адбылося ўсведамлення, глыбокага асэнсавання падзення Савецкага Саюза, новых шляхоў, якія адкрыліся пасля яго распаду, і трагедый, якое перажывала мясцовае насельніцтва.
Падзенне Берлінскай сцяны выклікала вялікі энтузіязм у сувязі са здабытай свабодай, але пры гэтым не ўлічвалася, што людзі страцілі ўсе грошы і былі вымушаныя гадзінамі стаяць у чарзе, каб атрымаць кавалак хлеба. Гэтая вельмі складаная сітуацыя, на думку кардынала, агаліла нервы былых савецкіх людзей і прывяла да адраджэння нацыяналізму, канфрантацыі, эканамічных цяжкасцяў, феномену алігархаў.
Свой нядаўні візіт у Беларусь у якасці спецыяльнага пасланніка Францішка на святкаванне 25-й гадавіны каранацыі цудатворнага абраза Маці Божай Будслаўскай іерарх пракаментаваў так:
«Цудоўнае свята народа, які пакутуе ў цішыні і які знайшоў у веры такую відавочную, на мой погляд, моц сведчання».
Па яго словах, гэтая сціплая выява Маці Божай стала для беларусаў «знакам ідэнтычнасці і надзеі».
Ён быў асабліва ўражаны тым, што ў рэгіёне, дзе суседнія народы змагаюцца адзін з адным, некалькі тысяч чалавек ішлі пешшу па лясах, сярод азёр, па складаных дарогах, маліліся на каленях і праяўлялі салідарнасць адно з адным. Блізкасць Папы дазваляе ім адчуць, што пра іх не забыліся, як адзначыў арцыбіскуп Гуджэроці.
Чытайце таксама:
Перамоўнік па Беларусі арцыбіскуп Гуджэроці стаў кардыналам
Арцыбіскуп Гуджэроці прызнаўся ў Будславе, што за мяжой вельмі сумаваў па беларускіх драніках
РПЦ запатрабавала ад папскага пасланніка абмежаваць дзейнасць уніятаў у Беларусі
«Паглядзіце, што нарабілі мужчыны». Марына Ментусава — пра жанчын, што выратуюць свет, працу ў Расіі, асабістае жыццё і «Обычное утро»9
«Паглядзіце, што нарабілі мужчыны». Марына Ментусава — пра жанчын, што выратуюць свет, працу ў Расіі, асабістае жыццё і «Обычное утро»
«Тое, што хтосьці сядзіць за палітыку, з'яўляецца часткай пейзажу». Беларуска, якая наведала радзіму пасля доўгага перапынку, падзялілася ўражаннямі1010
Каментары