«Рыхтуемся да найгоршага». У Асіповіцкім раёне невядома для каго рамантуюць кінуты вайсковы гарадок
У Асіповіцкім раёне багата кінутых вайсковых аб'ектаў. Адзін з іх у пасёлку Цэль. Пасля растыражаванай навіны пра магчымы лагер «вагнераўцаў» жыхары занепакоеныя: ці не да іх прыедуць?
Па словах жыхароў раёна, у Цэлі прыбіраюць тэрыторыю былой вайсковай часці. За працу ўзяліся ў першых чыслах чэрвеня.
«Асіповічы гудуць размовамі пра актыўны рамонт памяшканняў у Цэлі», — кажа жыхар райцэнтра.
Што там будзе, невядома, але растыражаваная навіна пра тое, што ў Асіповіцкім раёне могуць размясціць «вагнераўцаў», занепакоіла жыхароў раёна. Раней расійскі медыяпраект «Вёрстка» паведаміў, што адзін з лагераў, плошчай 24 тысячы м², разлічаны на 8 тысяч ложкаў, размесцяць у Асіповіцкім раёне.
«Дыму без агню не бывае. Рыхтуемся да найгоршага», — адзначыў яшчэ адзін суразмоўца «Нашай Нівы».
Раней у пасёлку Цэль дыслакавалася 465-я ракетная брыгада. Яна лічылася найменшай вайсковай часцю Асіповіцкага гарнізона. Па словах мясцовых жыхароў, у ёй служылі меней за 200 вайскоўцаў.
У 2018 годзе ракетчыкаў перакінулі ў Асіповічы. Многія аб’екты вайсковай інфраструктуры закансервавалі. Некаторыя прыстасавалі пад патрэбы пасёлка.
Яшчэ адзін суразмоўца, які назваўся жыхаром пасёлка, кажа, што з вайсковага гарадка камунальнікі вывозілі смецце, а цяпер вяртаюць «да жыцця» казармы, гаражы, майстэрні.
«Спачатку розныя начальнікі намякалі жыхарам, што ў гарадку размесцяць вайскоўцаў, якія будуць прыглядаць за ракетамі з Расіі, — адзначае ён. —
Цяпер пайшла пагалоска, што казармы заселяць не ракетчыкамі, а кімсьці іншым».
У пасёлку жыве блізу адной тысячы чалавек. Значная іх частка — пенсіянеры. Многія з маладзейшага насельніцтва ездзяць на працу ў Мінск, да якога 90 кіламетраў. Да Асіповічаў два дзясяткі.
Знікненне з Цэлі вайсковай часці для жыхароў стала трагедыяй. Па іх словах, пасёлак стаў занепадаць. Улада перастала клапаціцца пра яго, як тое было пры вайскоўцах.
Аб'екты інфраструктуры вайсковага гарадка, у тым ліку казармы, як незапатрабаваную маёмасць выстаўлялі на аўкцыён, але ахвотных купіць іх не знайшлося, як кажуць жыхары пасёлка.
У Асіповіцкім райвыканкаме сцвярджаюць, што не валодаюць інфармацыяй пра тое, што адбываецца ў Цэлі. Па словах чыноўнікаў, такім пытаннем іх даймаюць журналісты.
У Асіповіцкім раёне з савецкіх часоў засталося нямала вайсковых аб’ектаў. Цяпер там дыслакуюцца ракетчыкі і артылерысты. За 16 кіламетраў ад райцэнтра знаходзіцца палігон. На ім беларускія інструктары рыхтавалі да вайны ва Украіне расійскіх навабранцаў.
Пра тое, што ў «вагнераўцаў» ёсць варыянт перабрацца ў Беларусь, заявіў Уладзімір Пуцін у сваім звароце 26 чэрвеня. Гэтак жа ён пазбавіўся і ад кіраўніка ПВК «Вагнер» Яўгена Прыгожына пасля таго, як той узняў узброены мяцеж.
27 чэрвеня Лукашэнка пацвердзіў, што Прыгожын ужо ў Беларусі. Ён дадаў, што лагераў для «вагнераўцаў» не будуецца, але беларускія ўлады гатовыя размясціць у сябе наймітаў.
«Вагнераўцы» ўжо бывалі ў Беларусі і раней. У 2020 годзе тры дзясяткі баевікоў былі затрыманыя па падазрэнні ў падрыхтоўцы беспарадкаў. Калі пасля выбараў пачаліся пратэсты, іх перадалі Расіі.
ПВК «Вагнер» у дэмакратычным свеце лічыцца тэрарыстычнай арганізацыяй, якая вядомая ваеннымі злачынствамі ва Украіне. У яе шэрагах ваююць крымінальнікі, якіх завербавалі ў расійскіх турмах. Праславіліся «вагнераўцы» сваімі злачынствамі і ў іншых краінах, перадусім афрыканскіх.
«Наша Нiва» — бастыён беларушчыны
ПАДТРЫМАЦЬГлядзіце таксама:
Ядзерная гульня Пуціна і Лукашэнкі: у чым жа будзе роля беларусаў і якія могуць быць яе наступствы?
Ці можа Прыгожын перабазавацца ў Афрыку? Вось што ўяўляе сабой афрыканская сетка ПВК «Вагнер»
«Фенаменальны выбар Прыгожына…» Падаляк — пра мяцеж кіраўніка ПВК «Вагнер» і карысць ад яго
НАТА разглядае варыянт размясціць каля межаў з Расіяй да 300 тысяч сваіх вайскоўцаў
Каментары