19-гадовы Сулеман Даўд узяў з сабой кубік Рубіка, каб быць першым чалавекам, які сабраў яго на глыбіні большай за 3000 метраў.
Крысцін Даўд, маці і жонка загінулых Сулемана і Шахзады, расказала Бі-бі-сі пра тое, як і бацька, і сын, марылі спусціцца да патанулага «Тытаніка».
Да месца апускання адправілася ўся сям'я, але Крысцін з дачкой засталіся на борце «Палярнага прынца»: апускацца збіраліся толькі Сулеман і Шахзада. І бацька, і сын былі ў поўным захапленні ад будучай прыгоды.
Першы раз апусканне планавалася яшчэ да пандэміі, але тады Сулемана на борт батыскафа не ўзялі, бо існавала забарона на ўдзел у экспедыцыі дзяцей малодшых за 18 гадоў. Кампанію Шахзаду павінна была скласці сама Крысцін.
Аднак Covid-19 парушыў гэтыя планы і адклаў апусканне на некалькі гадоў, за якія Сулеман дасягнуў дазволенага ўзросту, і яго маці ахвотна саступіла яму сваё месца.
Крысцін абняла мужа і сына і стала разам з дачкой Алінай чакаць іх вяртання.
«Я была вельмі рада за іх, бо яны абодва сапраўды чакалі гэтага апускання на працягу даволі доўгага часу», — сказала яна.
Спачатку, калі ім сказалі, што сувязь з батыскафам знікла, яны і не думалі, што адбылася катастрофа. Тым больш, што каманда «Палярнага прынца» запэўніла іх, што ў гэтым няма нічога страшнага, што такія непаладкі здараюцца і што ёсць маса спосабаў, якімі падводны апарат можна падняць на паверхню, нават калі нейкае абсталяванне адмовіла.
Нейкі час Крысцін чакала, што «Тытан» вось-вось з'явіцца на паверхні, чапляючыся за найменшую надзею. Яна ведала, што запасаў кіслароду ў падводным апараце хопіць на чацвёра сутак, але час ішоў, і надзея раставала.
«Думаю, што канчаткова страціла надзею, калі скончыліся гэтыя 96 гадзін, — сказала яна. — Тады я і напісала сям'і, што рыхтуюся да найгоршага».
Аліна пратрымалася трохі даўжэй: «Яна не губляла надзеі да званка берагавой аховы. Калі яны паведамілі нам, што сапраўды знайшлі абломкі».
Крысцін расказала Бі-бі-сі пра тое, якімі былі яе муж і сын. Сулеман, напрыклад, быў літаральна апантаны кубікам Рубіка. Ён старанна вывучаў відэа ў YouTube і ўрэшце навучыўся збіраць знакамітую галаваломку ў рэкордна кароткія тэрміны. Яго асабісты рэкорд склаў усяго 12 секунд.
Яму падабалася здзіўляць навакольных, якія часам выказвалі сумневы ў яго здольнасцях. Адзін раз ён дэманстратыўна сабраў кубік Рубіка на вачах у здзіўленага ахоўніка і на развітанне аддаў яму сваю любімую цацку, сказаўшы, што, маўляў, цяпер вучыся ты.
Сулеман адправіў заяўку ў Кнігу рэкордаў Гінеса, сказаўшы, што мае намер ажыццявіць самую глыбакаводную зборку. На жаль, яму адмовілі ў унясенні ў спіс такога рэкорду, але ён усё роўна ўзяў кубік з сабой, а яго бацька прыхапіў камеру, каб захаваць працэс на глыбіні 3700 метраў.
Сулеман быў студэнтам універсітэта Стратклайда ў Глазга.
Крысцін сказала, што яе муж быў неймаверна цікаўным чалавекам.
«Ён ніколі не глядзеў мастацкія фільмы, а выключна дакументальныя. Часам увечары хочацца расслабіцца і паглядзець якую-небудзь мыльную оперу, але не, ён збіраў усю сям'ю, і мы глядзелі тое, што хацеў ён». Успамінаючы, як Шахзада настойваў на такім пазнавальным баўленні часу нават пасля вячэры, яна ўсміхнулася.
«У яго была дзіўная здольнасць па-дзіцячаму ўспрымаць тое, што адбываецца», — успомніла яна.
У мінулую нядзелю адбылася памінальная служба. Крысцін Даўд сказала, што была кранутая тым, што імам памаліўся за ўсіх пяцярых загінулых мужчын. «Я думаю, што розная вера ў гэтым выпадку значэння не мае», — сказала яна.
Крысцін з дачкой вырашылі ў гонар Сулемана навучыцца збіраць кубік Рубіка і паглядзець усе фільмы, якія яму падабаліся. Яны таксама маюць намер працягнуць усе праекты, у якіх удзельнічаў яе муж.
«Ён займаўся многімі рэчамі, — адзначыла яна. — Ён вельмі многім дапамог, і я хачу працягнуць яго спадчыну. Для нас з Алінай — гэта вельмі важна».
Крысцін адмовілася абмяркоўваць прычыны катастрофы. На пытанне, ці здолеюць яны з дачкой знайсці выхад з гэтых трагічных абставінаў, яна сказала, што не ведае, ці магчымы ў такой сітуацыі выхад наогул. «Я сумую па іх, — сказала яна. — Я сапраўды вельмі моцна сумую па іх».
Акрамя Сулемана і яго бацькі Шахзады Даўд, на борце «Тытана» загінулі яшчэ трое чалавек: Стоктан Раш, 61-гадовы генеральны дырэктар OceanGate, якой і належаў «Тытан», брытанскі бізнэсовец Хэміш Хардынг, 58 гадоў, і Пол-Анры Наржале, 77 гадоў, былы вадалаз французскага флоту і вядомы даследчык.
«Я нутром адчуваў кепскае» — Джэймс Кэмеран пра трагедыю батыскафа «Тытан»
Батыскаф пацярпеў крушэнне ад імплозіі. Тлумачым, што такое імплозія
Абломкі батыскафа «Тытан» знайшлі за 500 метраў ад «Тытаніка». Катастрафічныя разбурэнні
Кампанія OceanGate афіцыйна паведаміла пра гібель людзей, якія знаходзіліся ў батыскафе «Тытан»
Беларуская блогерка паказала, які жах можа адбывацца з вуснамі, калі хочаш іх павялічыць — а потым паменшыць6
Каментары