Пра гэта «Нашай Ніве» расказаў былы вязень, які перасякаўся з Андрэем Пачобутам у гродзенскай турме.
«Пачобут быў у стойкім стане духу, — кажа вязень. — У той жа час ціск на яго быў вялікі. У прыватнасці, ён дапускаў, што яму прысудзяць вышэйшую меру пакарання».
Вязень не ведае, гэта было дапушчэнне Пачобута ці гэтым вязня страшылі.
Андрэй Пачобут таксама дапускаў, што палітвязняў могуць расстраляць у выпадку ўступлення Беларусі ў вайну.
Перасякаўся былы вязень і з гродзенскім журналістам і грамадскім дзеячам Паўлам Мажэйкам. Яго таксама спрабуюць зламаць: па надуманых падставах кідаюць у ШІЗА. Мажэйка, па словах вязня, пачаў насіць акуляры, трохі хварэў, але трымаецца выключна мужна.
У выключна катавальных умовах у турме трымалі людзей з «групы Аўтуховіча», зняволенне цяжка давалася Любові Разановіч, кажа былы вязень. Яна жонка праваслаўнага святара з-пад Брэста, у якога Аўтуховіч нейкі час начаваў. Арыштавалі і асудзілі на гіганцкія тэрміны і самога святара, і яго жонку, і сына.
«Псіхозы — звычайны стан свядомасці чалавека ў турме, з улікам таго, у якіх умовах там трымаюць людзей лукашысты, — кажа вязень. — Псіхатычныя прыступы там здараюцца нярэдка. У некаторых псіхіка проста едзе. Я сядзеў з адным такім палітвязнем (прозвішча ёсць у Рэдакцыі. — НН)».
Праваабарончы рэсурс dissidentby.com усяго ў турме Гродна на сёння налічвае 84 палітвязняў, але гэтыя лічбы няпоўныя, бо не ўсе імёны вядомыя. Сярод зняволеных у Гродне, у прыватнасці, 19-гадовая Аніта Бакуновіч.
Па словах былога вязня, утрыманне ў катавальных умовах моцна мяняе людзей. Большасць з іх напаўняе прага помсты і аднаўлення справядлівасці. Многія, хто да турмы меў памяркоўныя погляды, робяцца настроенымі радыкальна, кажа былы вязень, які асабіста перасякаўся з дзясяткамі палітычных.
«Наша Нiва» — бастыён беларушчыны
ПАДТРЫМАЦЬ«Будзе здымаць маштабныя праекты з сабой у галоўнай ролі». Што думаюць пра новага міністра культуры Чарнецкага яго калегі?1
Каментары
'Пачобут таксама дапускаў, што палітвязняў могуць расстраляць у выпадку ўступлення Беларусі ў вайну.'
і потым адразу:
'Псіхозы — звычайны стан свядомасці чалавека ў турме'
То бок, вы лічаце, што такія думкі - псіхоз, і што небяспекі для палітвязняў у сувязі з расійскай агрэсіяй, ваенным часам увогуле не існуе? Дык мушу вам нагадаць, што рабіла НКВД з палітвязнямі ў 1941, альбо што робяць ФСБ і расійскія войскі з украінскімі актывістамі на акупаваных тэрыторыях.
Магчыма, вам падаюцца псіхозам дапушчэнні, што беларускіх палітвязняў могуць растраляць у выніку эскалацыі вайны і ўзмацнення кантролю рускімі над Беларуссю. Лукашыстам, мабыць, гэта сапраўды ня трэба. Але з пункту гледжання маскоўцаў, знішчэнне 'антырасійскіх элементаў' цалкам лагічнае. Спісы яны даўно маюць. А ў выпадку палітвязняў нават ня трэба спецыяльна шукаць нелаяльных - лукашысцкія ўлады іх ужо сабралі ў турмы. Варта разумець, што большасць 'палітычных' для маскоўцаў ворагі, асабліва 'нацыяналісты', а тым больш прадстаўнікі польскай меншасці. І наўрад ці карнікі сталі б разбірацца, за што ты сядзіш - за нелюбоў да Лукашэнкі, лайкі, пратэсныя маршы, фоткі акупацыйнай тэхнікі ці яшчэ што.
Так што, не спяшайцеся ўважаць за псіхоз думкі Пачобута .