У эфіры тэлеканала СТБ зноў накінуліся на Дзень святога Валянціна і Хэлоўін.
Вядучы Кірыл Казакоў пераконваў у студыі, што заходнія святы — чысты маркетынг.
«Тут жа няма нейкай ідэалагічнай подбіўкі — проста больш прадаць тавару. Больш сэрцайкаў у гэты дзень, больш руж. Ці нейкія карнавальныя касцюмы і гарбузы. Але, я дакладна ведаю, на ўзроўні некаторых адміністрацый забараняецца наогул у школах святкаваць. Між тым, ты прыходзіш у кавярню — усё ў сэрцайках. У школе сэрцайкаў няма, а тут сэрцайкі», — абураўся ён.
Іншая вядучая, Алена Сырава выказала думку, што трэба Дзень святога Валянціна і Хэлоўін не забараніць, а даць сваю альтэрнатыву.
«Каб пры іншых роўных выбіралі наша», — падкрэсліла яна.
Псіхолаг Анжаліка Сафонава тут жа знайшла замену.
«Чаму мы святкуем Дзень святога Валянціна, але не святкуем Дзень святых Пятра і Фяўронні 8 ліпеня?» — задаецца яна пытаннем.
І заклікае папулярызаваць гэтае свята, «кінуць усе рэсурсы», каб яно было нічым не горшым.
Жыццё святых Пятра і Фяўронні ў Рускай праваслаўнай царкве лічыцца прыкладам сям'і і кахання.
Гэта ўжо не першы раз, калі чыноўнікі і прапаганда спрабуюць забараніць Дзень усіх закаханых.Так, сёлета ў БДУ на 14 лютага прапанавалі замяніць рамантыку мерапрыемствамі, прымеркаванымі да любові да Радзімы.
Каментары