Круты расказаў, якія «саюзныя праграмы» ўжо атрымалася цалкам выканаць
Пасол Беларусі ў Расіі Дзмітрый Круты, выступаючы на тэлеканале «Беларусь 1», расказаў, што на гэты момант выканана 80% мерапрыемстваў, прадугледжаных у рамках зацверджаных Лукашэнкам і Пуціным інтэграцыйных 28 «саюзных праграм». На астатнія 20% прыпадаюць пытанні, аднесеныя на далёкую перспектыву.
Частка «саюзных праграм», па словах Крутога, мае доўгатэрміновы характар і будзе рэалізоўвацца аж да 2030 года.
Але восем праграм нібыта ўжо выкананыя цалкам. Тры з іх тычацца фінансавага сектару. Першая — гэта гарманізацыя валютнага заканадаўства і кантролю. Другая — барацьба з адмываннем грошай, фінансаваннем тэрарызму. Трэцяя — уніфікацыя бухгалтарскага ўліку.
Таксама, паводле Крутога, удалося рэалізаваць тры праграмы ў галіне інфармацыйных сістэм: па адсочвальнасці, фітасанітарным і ветэрынарным кантролі, у тым ліку назіранні за транспартнымі планамі.
Сёмая выкананая «саюзная праграма» — атамная энергетыка, а восьмая — адзіныя правілы канкурэнцыі.
«Адпаведнае пагадненне падпісанае. Уніфікаваная на ўзроўні Мінпрамгандлю Расіі і нашага МАРГ нарматыўная база. Таму праграма таксама прызнаная паспяховай», — падкрэсліў Дзмітрый Круты.
Адносна астатніх 20 праграм, то нібыта засталося рэалізаваць каля 120 мерапрыемстваў. Але некаторыя будуць рабіцца да 2030 года, «як прыклад — сфера макраэканомікі і грашова-крэдытнага рэгулявання».
Памерлага 52-гадовага аўтаслесара з Віцебска год таму страшна збілі міліцыянты12
Каментары