Выданне пра Мінск CityDog.io назвала 12 чалавек, якія, на яго думку, з'яўляюцца мінчукамі 2022 года. «Мы назвалі гэтых людзей найлепшымі, таму што нават у самай экстрэмальнай сітуацыі (безграшоўе, дэпрэсія, рэпрэсіі, турма, эміграцыя, вайна і проста стомленасць ад усіх і ўсяго) яны робяць сваю справу. І так робяць сябе, нас і Мінск больш моцнымі і прыкметнымі». Сярод адзначаных выданнем — палітвязень-нашанівец Андрэй Скурко.
Аргументуе свой выбар рэдакцыя выдання так:
«Рэдактар Андрэй Скурко — палітвязень. Яго затрымалі 8 ліпеня 2021 года і змясцілі ў ІЧУ на завулку Акрэсціна. У сакавіку 2022-га яго прызналі вінаватым паводле ч. 2 арт. 216 Крымінальнага кодэкса і прысудзілі 2,5 гады пазбаўлення волі ў калоніі агульнага рэжыму.
Дома Андрэя чакае маленькі сын Тамаш, для якога тата, падчас знаходжання ў турме, пераклаў на беларускую мову «Айбаліта» Карнея Чукоўскага.
І самы галоўны падарунак 2022 года — у Андрэя Скурко выйшла кніга выдатных дзіцячых вершаў «Пра сланоў і барсучкоў» — і яна ўжо стала бестселерам. А яшчэ вершы Андрэя аніміраваныя на YouTube-канале «Бэйбус»: усяго апублікавана 67 мультфільмаў-вершаў».
Акрамя Андрэя Скурко, рэдакцыя «Сіцідога» адзначыла:
- ілюстратарку Наталлю Грабёнкіну,
- супрацоўнікаў Музея гісторыі Мінска,
- стрыт-арт-мастака Міцю Післяка,
- канцэртнага прадзюсара Генадзя Шульмана,
- аўтараў гайда па тусовачным Мінску дзевяностых Паўла Валатовіча і Аляксея Кавалёва,
- нобелеўскага лаўрэата, праваабаронцу Алеся Бяляцкага,
- польскага гісторыка Дарыюша Рольніка,
- нядаўна памерлых мастацтвазнаўцу і тэатральнага крытыка Аляксея Стрэльнікава і мастака Алеся Родзіна,
- дыктара — голас стадыёна «Дынама» — Леаніда Бандаровіча,
- уладальніка легендарнай кавярні «У Дзеда» Аляксандра Бажко.
Удзельніка «X-фактара» арыштавалі за палітыку — хутка будзе суд1
Каментары